Եգիպտոսում և Լիբիայում ԱՄՆ դիվանագիտական առաքելությունների դեմ իրականացված վերջին հարձակումների ֆոնին, ԱՄՆ դեսպանատունը տեղեկացնում է Հայաստանում ԱՄՆ քաղաքացիներին աշխարհում ահաբեկչական գործողությունների շարունակական սպառնալիքի մասին:
Հայաստանում ԱՄՆ դեսպանատան կայքում հաղորդվում է, որ, հաշվի առնելով ընթացիկ իրավիճակի անորոշությունն ու անկայունությունը, դեսպանատունը կոչ է անում Հայաստանում ճանապարհորդող կամ բնակվող ԱՄՆ քաղաքացիներին զգոն լինել շրջապատի հանդեպ, հետևել լրատվական հրապարակումներին և համապատասխան քայլեր ձեռնարկել սեփական անվտանգության ապահովման համար:
Երևանում ԱՄՆ դեսպանատունը հստակ տեղեկություն չունի` նշելու, որ այդ իրադարձությունները կազդեն Երևանում ԱՄՆ-ի դեսպանության և քաղաքացիների անվտանգության վրա, այնուհանդերձ, առաջիկայում ԱՄՆ բոլոր քաղաքացիները պետք է զգոն լինեն և կասկածելի հանգամանքերի առկայության դեպքում այդ մասին իրազեկեն տեղի իշխանություններին:
Ի դեպ, այսօր ավելի վաղ տեղեկացրել էինք, որ RBK-ն գրել է մի շարք երկրների ամերիկյան դեսպանատների կողմից հակաամերիկյան ակցիաների մտավախության մասին: Ցուցակում Բուրունդիի, Քուվեյթի, Սուդանի, Զամբիայի, Եգիպտոսի և Թունիսի կողքին ներկայացված էր նաև Հայաստանը: Հայաստանում ԱՄՆ դեսպանատան կայքը ոչ թե մտավախություն է հայտնել Հայաստանում ԱՄՆ քաղաքացիների անվտանգության հարցի շուրջ, այլ պարզապես իր քաղաքացիներին զգոնության կոչ արել և խորհուրդ տվել հետևել իրադարձությունների զարգացմանը:
Երևանում ԱՄՆ դեսպանատանն ուղղված «Առաջին լրատվական»-ի այն հարցին ի պատասխան, թե ինչու՞ Ադրբեջանի և Վրաստանի ամերիկյան դեսպանությունների կայքերում նմանօրինակ նախազգուշական հայտարարություններ չկան, դիվանագիտական առաքելությունը խոստացել է պաշտոնական պարզաբանում տալ մի քանի ժամից:
