«Սա նման կարգի առաջին դեպքը չէ, և ես մտավախություն ունեմ, որ վերջինն էլ չի լինի, երբ Ռուսաստանը զենք է մատակարարում Ադրբեջան` արդարացնելով դա սեփական տնտեսական շահերով»,- անդրադառնալով ռուսական «Ռոսվերտոլ» ընկերության կողմից Ադրբեջանին «Մի-35Մ» մակնիշի մարտական 24 ուղղաթիռներ վաճառելու մասին տեղեկատվությանը` կարծիք հայտնեց Քաղաքագետների միության նախագահ Հմայակ Հովհաննիսյանը:
Նշենք, որ ուղղաթիռների վաճառքի մասին տեղեկատվությունը հրապարակվեց Սանկտ Պետերբուրգում Մեդվեդև-Սարգսյան հանդիպումից հետո և Սոչիում մարտի 5-ին սպասվելիք Մեդվեդև-Սարգսյան-Ալիև հանդիպումից առաջ:
«Առաջին լրատվականի» հետ զրույցում Հմայակ Հովհաննիսյանը չցանկացավ այս գործարքը կապել առաջիկայում կայանալիք եռակողմ հանդիպման հետ. «Անմիջական կապ չեմ տեսնում, ավելի շուտ ես դա դիտում եմ որպես արդեն իսկ ընդունված գործելակերպ Ռուսաստանի կողմից»:
Քաղաքագետը չի կարծում, որ ուղղաթիռների վաճառքը Ադրբեջանին և Հայաստանում գազի սակագինը չբարձրացնելը փորձ է հերթական հանդիպումից առաջ կանխորոշելու բանակցային գործընթացի ընթացքը և արդյունքները: Նրա դիտարկմամբ, Սոչիի հանդիպման հիմնական նպատակը լինելու է պատերազմի վերսկսումից հրաժարվելու անհրաժեշտության ընդգծումը:
«Ռուսաստանի համար հիմնական խնդիրը մեր տարածաշրջանն ակտիվ ռազմական գործողություններից հեռու պահելն է, որովհետև այս իրավիճակում, երբ լուրջ իրադարձություններ են ծավալվել Մերձավոր Արևելքում, Ռուսաստանը մտահոգված է, որ այդ գործընթացները կարող են արձագանքներ ունենալ ռուսական Հյուսիսային Կովկասում և անդրադառնալ Ռուսաստանի խոցելի աշխարհաքաղաքական հետաքրքրությունների վրա»,- ասաց Հովհաննիսյանը:
