Ստամբուլում հրապարակվող հայկական «Ակօս» թերթի փոխանցմամբ՝ 1915 թվականին Օսմանյան կայսրությունում Հայոց ցեղասպանության հիմնական կազմակերպիչներից Ջեմալ փաշայի թոռ, թուրքական Milliyet թերթի մեկնաբան Հասան Ջեմալը հրատարակել է «1915 – Հայոց ցեղասպանություն» գիրքը:
Դրանում Հասան Ջեմալը գրում է. «Ցեղասպանության հերքումը նշանակում է մեղսակից լինել մարդկության դեմ կատարված այդ հանցագործությանը: Ինչպե՞ս մենք կարող ենք առաջ գնալ՝ առանց անցյալի ուսումնասիրման: Մենք չենք կարող լռել անցյալի վերքերի շուրջ: 1915 թվականի ցավը ոչ թե պատմություն է, այլ՝ այսօրվա խնդիր»:
Ավելի վաղ նույնպես Հասան Ջեմալը բազմիցս հայտարարել է, որ 1915 թվականի իրադարձությունները Ցեղասպանություն են: Գրքի առաջին գլխում Հասան Ջեմալը ներկայացնում է իր ապրումները, երբ 2000-ական թվականներին իր համար առաջին անգամ պարզել է 1915 թվականի իրադարձությունների իսկությունը: Դրանից հետո նրան սկսել են թշնամաբար ընկալել Թուրքիայում և անգամ անվանել «հայրենիքի դավաճան»: Գրքում Հասանը մեծ տեղ է հատկացրել Հրանտ Դինքի սպանությանը, որում նա Դինքին անվանում է եղբայր:
Գրքի երկրորդ հատվածում Հասան Ջեմալը պատմում է, թե ինչպես 1915 թվականի իրադարձությունների իսկությունը փոխեց իրեն, իր աշխարհայացքը, վերափոխեց իր կյանքը: Գրքի երրորդ («Պապի փաշա կամ Ջեմալ փաշա» ) մասում էլ նա պատմում է իր պապ Ջեմալ փաշայի ու նրա ընտանիքի մասին:
Հասանը պատմում է, որ իր պապը հիանալի զինվորական է եղել և լավ է գլուխ հանել իր գործից: Նա ուշադրություն է հրավիրել այն բանի վրա, որ Մուսթաֆա Քեմալ Աթաթուրքն ատել է Թալեաթին ու Էնվերին, ինչը չի կարելի ասել Ջեմալ փաշայի պարագայում:
