The Wall Street Journal ամսագրի բլոգում երեկ հայտնվել է այն երկրների վարկանիշային աղյուսակը, որտեղ առավել նպաստավոր պայմաններ կան ապստամբությունների և հուզումների համար:
Ցուցակում տեղ է զբաղեցրել նաև Ադրբեջանը, որը զբաղեցնում է 10-րդ տեղը` 78.6 ցուցանիշով:
Ցուցակում ընդգրկված է 85 երկիր, սակայն Հայաստանը ցուցակից դուրս է մնացել, թեպետ աշխարհի շատ զարգացած երկրներ են ներառված: Վերջիններս զբաղեցնում են այս վարկանիշային ցուցակի ամենաստորին հորիզոնականները: Օրինակ` Լիբիան այս ցուցակում 13-րդն է` 76.9 ինդեքսով, Եգիպտոսը` 16-րդը (75.3), Թունիսը` 21-րդը (69.1):
Ցուցակը կազմելիս հաշվի են առնվել երեք ինդեքսներ` կոռուպցիայի աստիճանը բնակչության ընկալմամբ (հաշվարկվել է Transparency International-ի կողմից), մարդկային պոտենցիալի զարգացման ինդեքսը, որը ներկայացնում է ՄԱԿ-ը, և այսպես կոչված Ջիննի ինդեքսը, որը ցույց է տալիս, թե որքան մեծ է տարբերությունը տվյալ երկրի հասարակության տարբեր շերտերի միջև: Ինդեքսը հաշվարկելիս հաշվի չեն առնվել տնտեսական ցուցանիշները:
Ցուցակում առաջին հորիզոնականը զբաղեցնում է Քենիան, որին հետևում են Կամերունը, Պակիստանը, Նիգերիան, Ինդոնեզիան, Ֆիլիպինները, Գվատեմալան, Մարոկոն, Հորդանանը և Ադրբեջանը: Ռուսաստանն այս ցուցակում 40-րդն է: Ավելի բարձր հորիզոնականներում են Վրաստանը, Ուզբեկստանը, Ուկրաինան և Բելառուսը:
