Հայաստանի խորհրդարանը սեպտեմբերի 11-ին առաջին ընթերցմամբ ընդունել է «Ազգային ժողովի կանոնակարգ-օրենքում փոխոխություններ կատարելու մասին» օրենքի նախագիծը: Կողմ է քվեարկել 96, դեմ՝ 4, ձեռնպահ` 3 պատգամավոր:
Օրենքի նախագծին դեմ է քվեարկել Դաշնակցություն խմբակցությունը, քանի որ խորհրդարանի երեկվա նիստում ՀՅԴ, ՀԱԿ և «Ժառանգություն» խորհրդարանական խմբակցությունների ներկայացրած առաջարկություններն ուշադրության չեն արժանացել:
Օրենսդրական նախաձեռնութան հեղինակը Հայաստանի Հանրապետական կուսակցությունն է:
Հիշեցնենք՝ Դաշնակցություն խմբակցության պատգամավոր Արծվիկ Մինասյանը ՀՅԴ-ի, Հայ ազգային կոնգրեսի և «Ժառանգության» կողմից հանդես էր եկել առաջարկություններով, մասնավորապես` առաջարկվել էր պատգամավորների համար վճարովի օգնականներ ընդունել, որոնք կմասնակցեն մշտական հանձնաժողովի աշխատանքներին:
«Այդպիսով` պատգամավորները կունենան իրենց ներկայացուցիչները մշտական հանձնաժողովներում, որը կթեթևացնի իրենց աշխատանքը և չի հանգեցնի անհարգալից բացակայությունների: Պատգամավորը ֆիզիկապես չի կարող ներկա գտնվել երեք հանձնաժողովների նիստերին, որոնք զուգահեռ կատարում են իրենց աշխատանքը»,- ասել էր նա:
