Վերահսկիչ պալատի` 2011 թվականի հաշվետվությունը որակապես տարբերվում է նախորդ տարիների հաշվետվություններից, քանի որ կազմված է հատուկ ստանդարտներով, մանրամասն դիտարկումների հիման վրա: Հաշվետվության ներկայացման ժամանակ այսօր ԱԺ-ում այս մասին հայտարարեց Վերահսկիչ պալատի նախագահ Իշխան Զաքարյանը:
Նրա խոսքով` պետական մասնակցության մի շարք կազմակերպություններ աշխատում են մշտական վնասով, հողային որոշ պաշարներ առհասարակ չեն օգտագործվում, հետևաբար դրանց գործածությունից ոչ մի հարկ չի գանձվում:
Անդրադառնալով մի շարք ոլորտներում առկա թերություններին և բացթողումներին՝ պաշտոնյան նշեց, որ Վերահսկիչ պալատի իրականացրած ստուգումների արդյունքում հայտնաբերվել են բազմաթիվ ռիսկեր, որոշ գործընթացներ ֆինանսավորվել են առանց նախնական լուրջ հետազոտությունների:
«Հայտերը շատ դեպքերում չեն ուսումնասիրվել, կամ դրանց ուսումնասիրությունը կրել է ձևական բնույթ: Վերահսկիչ պալատը ստուգումներ է իրականացրել նաև առողջապահության ոլորտում: Օրինակ` բացահայտել ենք, որ չկատարված որոշ աշխատանքների դիմաց որոշ առողջապահական մարմինների տրվել են վճարումներ:
Ինչ վերաբերում է սոցիալական ոլորտին, ապա շատ դեպքերում թաքցվել են որոշ ընտանիքների ունեցած իրական եկամուտները: Նույն այդ ընտանիքները կեղծ ճանապարհով պետությունից համապատասխան արտոնություններ ու նպաստներ են ստացել: Կամ` հաշմանդամության կարգ չունեցող որոշ քաղաքացիներ փաստաթղթերի կեղծման ճանապարհով հաշմանդամության նպաստներ են ստացել»,- նշեց նա:
Իշխան Զաքարյանը նաև նշեց, որ ստուգումների արդյունքում բազմաբնույթ խախտումներ են հայտնաբերվել նաև շինարարության ոլորտում՝ ձևական փորձագիտական վերահսկողություն, արհեստական ուռճացված տոկոսադրույքներ, ոչ պատշաճ տեխնիկական վերահսկողություն, գործող ստանդարտներին չհամապատասխանող շինանյութի գործածում և այլն:
«Մտահոգիչ բոլոր այս փաստերը զեկուցվել են ՀՀ նախագահին, ով մեր կառույցին հանձնարարել է 2013-ի հունվարից անցնել առավել ռիսկային ծրագրերի օպերատիվ վերահսկողության: Վերահսկիչ պալատը, սակայն, միայն պատժող ձեռք չէ, և պետք է նշել, որ վերջին երկու տարիների իր աշխատանքով բազմաթիվ խնդիրներ է լուծել: Միաժամանակ, շտկման կարիք զգացող մի շարք հարցեր դեռևս բաց են մնում»,- նկատեց պաշտոնյան:
Հաշվետվության ներկայացումից հետո ԱԺ նախագահ Հովիկ Աբրահամյանը հետաքրքրվեց՝ ի՞նչ պետք է անել, որպեսզի Վերահսկիչ պալատի տարեկան հաշվետվություններում ամեն տարի եղած նույնատիպ խնդիրներն ի վերջո լուծում գտնեն:
Ի պատասխան՝ Իշխան Զաքարյանը նշեց, որ իրենք շարունակում են ամենատարբեր ոլորտներում հետևողական լուրջ աշխատանքներ իրականացնել՝ հայտնաբերելու և վերացնելու համար առկա բացերը:
«Իրավապահ մարմիններին, օրինակ, մեր կողմից ուղարկվել են առավել արտառոց 3 գործեր, հարուցվել են քրգործեր, կան մարդիկ, ովքեր դատապարտված են և ներկայումս պատիժ են կրում»,- ասաց նա: