Թուրքական Zaman թերթի փոխանցմամբ՝ Թուրքիայի վարչապետ Ռեջեփ Էրդողանն Ադրբեջան մեկնելուց առաջ լրագրողների հետ ունեցած զրույցում անդրադարձել է օրեր առաջ Աֆյոնքարահիսարի զինապահեստում գրանցված պայթյունին, որին զոհ էր գնացել 25 զինծառայող.
«Ներկայումս ընթանում են զոհվածների դիակների հետազոտման և հետաքննման աշխատանքները:Արդեն իսկ ավարտվել է նրանցից 19-ից ԴՆԹ-ի թեստ վերցնելու գործընթացը: Այդ ամենի ավարտից հետո զինծառայողների դիակները կվերադարձվեն իրենց ընտանիքներին:
Զինապահեստի պայթյունի հետ կապված՝ ազատվել են այնտեղ զինծառայություն անցնող 4 մարդ՝ գնդապետ, փոխգնդապետ, մայոր և ենթասպա»: Էրդողանը քննադատել է նաև ընդդիմադիր Ժողովրդա-հանրապետական կուսակցության նախագահ Քեմալ Քըլըչդարօղլուին, որը հայտարարել էր, թե գրեթե 100 տոկոսով Աֆյոնքարահիսարի զինապահեստի պայթյունը ահաբեկչություն է, և որ պայթուցիկը գործի է գցվել բջջային հեռախոսի միջոցով:
Թուրքիայի զինված ուժերն իրենց հերթին հայտարարություն են տարածել, թե դատական հայց են ներկայացնելու Քըլըչդարօղլուի դեմ՝ այդպիսի հայտարարություն անելու համար:
