«168 ժամ»-ի թղթակցի հարցին, թե` ինչպե՞ս եք տեսնում Հունգարիայի հետ Հայաստանի հետագա հարաբերությունները, ՀՀ արտակարգ և լիազոր դեսպան Արման Նավասարդյանը պատասխանել է. «Ժամանակը ցույց կտա, այսօր այդ հարաբերություններն անորոշ են, մշուշի մեջ: Սակայն մտածել, որ մի մարդասպանի պատճառով Հունգարիայի նման երկիրը կարող է դուրս մնալ մեր դիվանագիտական աշխարհագրությունից` առնվազն մանկամտություն է` ինֆանտիլիզմ: Ընդհակառակ, ստեղծված իրադրությունում հարկ է գտնել ոչ ստանդարտ լուծումներ:
Մենք այսօր մեր դեմ տեսնում ենք երկու թշնամի` Ադրբեջան և Հունգարիա: Մի՞թե դա խելամիտ է, ինչպե՞ս կարելի է հավասարության նշան դնել այդ երկրների միջև: Իսկ ավելի ճիշտ չէ՞ր լինի, օրինակ, ուղիներ փնտրել` ալյանս կազմելու Բուդապեշտի հետ, և գործողության սլաքն ուղղել Բաքվի դեմ: Սա ենթադրական մտորում է: Սակայն դիվանագիտության մեջ ամեն միջոց ընդունելի է, եթե այն բխում է երկրիդ շահերից»:
