Գերմանացիների ընտանիքը հանգստի մեկնելիս մեքենան թողել է օդանավակայանում, իսկ վերադառնալիս տեսել, որ այն իրենց կողքով է անցնում, սրահում՝ մի քանի մարդ, իսկ ղեկին՝ անծանոթ վարորդ: Ինչպես հաղորդում է The Local-ը, դեպքը տեղի է ունեցել Դյուսելդորֆի օդանավակայանում:
Հաջողվել է պարզել, որ ավտոմեքենան առանց դրա սեփականատիրոջ գիտության, օդանավակայանի աշխատակիցները վերածել են հասարակական փոխադրամիջոցի՝ ուղևորներին տեղափոխելու համար: Պարզվել է, որ կայանատեղին, որտեղ կանգնել է ավտոմեքենան, նախատեսված է եղել երթուղային տաքսիների կայանման համար:
Մեքենայի սեփականատիրոջ բացակայության ընթացքում դրա վրա ամրացրել են տաքսու նշաններ: Մեքենան վարել է 21-ամյա վարորդը, որը ինչպես ցույց է տվել ոստիկանական ստուգումը, անգամ մեքենա վարելու իրավունք չի ունեցել:
Տրանսպորտային ընկերությունից հայտարարել են, որ կատարվածը եզակի դեպք է, և դրա համար մեղադրել են «ժամանակավոր վարձած աշխատակցին»: Ընդ որում` մեքենայի տերերը պարզել են, որ իրենց բացակայության ընթացքում մեքենան անցել է 400 կմ:
Այս պահին ոստիկանությունը զբաղվում է կատարվածի հետաքննությամբ:
