Ֆրանսիայի ոստիկանությունը Անսի լճի մոտ իրականացված սպանության հետաքննության շրջանակներում ուսումնասիրում է զոհերից մեկի և նրա եղբոր ֆինանսական տարաձայնությունները: Այս մասին հաղորդում է France-Presse գործակալությունը՝ վկայակոչելով դատախազ Էրիկ Մայոյին:
«Կարծես թե երկու եղբայրները վիճել են փողի պատճառով: Այս տեղեկությունը, որը ստացվել է բրիտանական ոստիկանությունից, թվում է՝ վստահության արժանի է»,- հայտարարել է նա՝ զգուշացնելով, որ առայժմ վաղ է որևէ եզրակացություն անել: Մայոն ավելացրել է, թե դժվար է պատկերացնել, որ ընտանիքի ներսում ֆինանսական տարաձայնութունները կարող են պատճառ հանդիսանալ 4 մարդու սպանության համար:
Սպանված Սաադ Ալ-Հիլլի եղբայրը ծնունդով Իրաքից է և ունի Բրիտանիայի քաղաքացիություն: Նա սեպտեմբերի 6-ին ներկայացել է ոստիկանություն՝ հայտարարելու, որ ինքը որևէ կապ չունի սպանության հետ:
Ինչպես հաղորդումէ The Daily Telegraph-ը, Ալ-Հիլլիի հարևանները պատմել են, որ Ֆրանսիա մեկնելուց առաջ նա որոշ մտավախություններ է հայտնել և խնդրել նրանց հետևել իր տանը:
Ալ-Հիլլին Իրաքը լքել է 1970-ական թթ., մասնագիտությամբ ինժեներ է: Վերջին տարիներին ապրում էր Քլեյգեյթ քաղաքում: Բրիտանական The Daily Mail թերթի փոխանցմամբ՝ Իրաքի պատերազմի սկզբում՝ 2003 թ. մի քանի շաբաթ նրան հետևում էին MI5 հակահետախուզության գործակալները:
Սպանությունը, որի մասին խոսվում է, տեղի է ունեցել սեպտեմբերի 5-ին: Հաջորդ օրվա երեկոյան հաջողվել է պարզել սպանվածների ինքնությունը: Պարզվել է, որ դրանք ծագումով իրաքցի Սաադ Ալ-Հիլլին է, նրա կինը՝ Իկբալը (Իրաքի քաղաքացի), վերջինիս մայրը, որի մոտ եղել է շվեդական անձնագիր: Նրանք բոլորը սպանվել են գլխին ստացած վերքից, ինչի հետ կապված ոստիկանությունը կասկածում է, որ սպանություններն իրականցվել են պրոֆեսիոնալ մարդասպանի կողմից: Բացի այդ, նրանց մեքենայից ոչ հեռու հայտնաբերվել է մի հեծանվորդի դիակ:
