Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը՝ դատավոր Արթուր Մկրտչյանի նախագահությամբ, այսօր 3 տարվա ազատազրկման է դատապարտել 2012 թ. մայիսի 6-ի ՀՀ ԱԺ ընտրություններին ԲՀԿ-ի օգտին ընտրակաշառք բաժանած, ԲՀԿ անդամ Արմեն Մաթևոսյանին:
Դատարանը, սակայն, որոշել է պատիժը պայմանականորեն չկիրառել՝ նշանակելով փորձաշրջան:
Հիշեցնենք, որ քրեական գործի նախաքննությամբ պարզվել և հիմնավորվել էր, որ ԲՀԿ անդամ Ա. Մաթևոսյանը 2012 թ. ապրիլի կեսերին քաղաքացի Ծ. Կ.-ին տվել է 10 000 դրամ ընտրակաշառք, ապրիլի 27-ին Հ. Ջ.-ին տվել է 35 000 դրամ, իսկ մայիսի 5-ին համապատասխանաբար` 15 000 և 35 000 դրամ ընտրակաշառք է տվել Հ. Ն.-ին և Հ. Ա.-ին, որպեսզի վերջիններս և նրանց ընտանիքի անդամները 2012 թ. մայիսի 6-ի ՀՀ ԱԺ ընտրություններում քվեարկեն «Բարգավաճ Հայաստան» կուսակցության օգտին` այդ կերպ խոչընդոտելով ընտրողների կամքի ազատ իրականացմանը:
Ձեռք բերված ապացույցների հիման վրա Ա. Մաթևոսյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի 2-րդ մասով: Գործով ամբաստանյալ Մաթևոսյանը ընդունել իր մեղքը և միջնորդել անցկացնել արագացված դատաքննություն, ինչն էլ դատարանը բավարարել էր: