Սեպտեմբերի 3- ին Սոֆիայի Զինվորական պալատի սրահում տեղի է ունեցել Բուլղարահայոց Թեմի հիմնադրման 145-ամյակին նվիրված գիտաժողով:
Նախադեպը չունեցող գիտաժողովն անցել է Բուլղարահայոց Թեմի Առաջնորդական Տեղապահ Տ. Աբգար Վրդ. Հովակիմյանի նախագահությամբ, ներկա են եղել ՀՀ Մշակույթի նախարար Տիկին Հասմիկ Պողոսյանը, Բուլղարիայում ՀՀ դեսպան Տիար Արսեն Սհոյանը, Քույր Եկեղեցիների, Քրիստոնեական այլ հարանվանությունների, մահմեդական ու հրեական համայնքների ներկայացուցիչներ, Բուլղարիայի ԳԱ ակադեմիկոսներ, հայ և օտարազգի գիտնականներ :
Գիտաժողովը աղոթքով սկսելով` Հոգեշնորհ Աբգար Վարդապետն ողջունել է ներկաներին ու հանդես եկել բացման խոսքով: Այնուհետև ողջույնի խոսքով են հանդես եկել Պողոսյանն ու Սհոյանը:
Ներկայացված զեկույցներով ու քննախոսություններով անդրադարձ է կատարվել Բուլղարահայ համայնքի առաջացմանը, Բալկաններում հայկական ներկայությանը, Բուլղարահայոց Թեմի հիմնադրման նախադրյալներին, Բուլղարիայի ու բուլղար ժողովրդի հասարակական, քաղաքական և մշակութային կյանքում հայ համայնքի դերակատարությանը, հայ- բուլղարական հարաբերությունների առանձնահատկություններին:
Գիտաժողովն ընթացել է հագեցած ծրագրով և ներկաների ակտիվ մասնակցությամբ:
Երեկոյան` գիտաժողովի փակումից հետո, մասնակիցներն այցելել են կառուցման փուլում գտնվող Սոֆիայի Սբ. Աստվածածին Եկեղեցի:
