Սիրիայի կառավարության և ընդդիմադիր ուժերի միջև զինված հակամարտությունը դեռ լարվածության մեջ է պահում արաբական հանրապետության խոշորագույն քաղաքները: Հինգշաբթի Դամասկոսի մոտակայքում Սիթ-Զեյնաբ մզկիթի մոտ տեղի է ունեցել դաժան փոխհրաձգություն այնտեղ տեղակայված բանակային մեծ դիրքի վրա հարձակված զինյալների հետ: Արդյունքում 4 զինծառայող է զոհվել: ԶԼՄ-ների տվյալներով` Դամասկոսի հարավ-արևելյան ծայրամասում թնդանոթները Կասյուն լեռան վրայից հարվածել են ապստամբների դիրքերի ուղղությամբ` Թադամունում և Հաջր-էլ-Ասվադում: Հաղորդվել է նաև բանակային հատուկ ստորաբաժանումների և ընդդիմադիրների բախումների մասին Քադամ և Ասալի շրջաններում:
Երկօրյա ուժեղ հրետակոծությունից հետո Հալեպի շրջանների մեծ մասում համեմատաբար խաղաղ է: Լարվածության կենտրոն են մնում Սեյֆ-էդ-Դաուլյա, Իզաա, Սուկկարի, Զբեյդիյա և Հաննանո թաղամասերը: Ավելի վաղ հաջողվել է դրանց զգալի մասից հեռացնել զինյալներին:
Հոմսում քաղաքի երկու կենտրոնական թաղամասերում` Բեբ-Հուվուդում և Բեբ-Թուրքմանում մարտերի ժամանակ, սիրիական ռազմական աղբյուրների վկայությամբ, 44 «վարձկան և ահաբեկիչ» սպանվել է, ևս 16-ը վիրավորվել են:
Սիրիական ճգնաժամի մասին խոսել է Թուրքիայի վարչապետ Թաիփ Էրդողանը: Նա Ասադին անվանել է «քաղաքական դիակ»` ասելով, որ վաղ թե ուշ սիրիացիները կհաղթեն. ինքը դրանում չի կասկածում: Էրդողանը հատուկ նշել է, որ կուզենար «Մոսկվայից և Պեկինից լսել, որ իրենք դեմ են տիրող վարչակարգին»: Վարչապետը նշել է, որ Սիրիայում իրավիճակի կարգավորմամբ հետաքրքրված երկրները պետք է «անեն միջազգային օրենսդրությանբ սահմանված ամեն բան»:
Ժնևի Ազգերի պալատում, որտեղ տեղակայված է ՄԱԿ-ի Եվրոպական մասնաճյուղի շտաբը, այսօր Սիրիայի իրավիճակին նվիրված հումանիտար ֆորում տեղի կունենա: Ավանդույթի համաձայն` դրան կմասնակցեն ՄԱԿ-ի անդամ երկրների, ինչպես նաև` տարածաշրջանային և ոչ կառավարական կազմակերպությունների ներկայացուցիչները:
