Ռուսաստանի ԳԱ Համաշխարհային տնտեսության և արտաքին հարաբերությունների ինստիտուտի առաջատար մասնագետ Ալեքսանդր Կռիլովը կարծում է, որ Սաֆարովի արտահանձնումը կուժեղացնի տարածաշրջանային լարվածությունը:
«Այն, որ դա սրում է իրավիճակն ու բարդացնում բանակցությունները, կարելի է ասել՝ անգամ դադարեցնում է բանակցային գործընթացը, տեսանելի է: Դա բարդացնում է հիմնախնդրի լուծման բանակցային գործընթացը, տեղի ունեցածը խաղաղ կարգավորման օգտին չէ: Բայց ասել, որ դա աղետ կլինի և վաղը կսկսվի պատերազմ, ճիշտ չէ: Չնայած հասկանալի է, որ Հայաստանում շատ բուռն արձագանք կլինի: Մի կողմից էլ Իրանի խնդիրը կա: Ստացվում է, որ իրավիճակը տարածաշրջանում գնալով ավելի ու ավելի է վատանում»,- նկատեց Կռիլովը՝ «Առաջին լրատվական»-ի հետ զրույցում:
Ըստ նրա՝ այն, որ նման մարդը հերոս է հռչակվում Ադրբեջանում, փաստում է այն մասին, որ այդ պետությունը ոչ թե ձգտում է խաղաղության, այլ ձգտում է հարցը լուծել պատերազմի ճանապարհով: Նա նկատեց, որ այսօր առաջ է քշվում ԼՂ ճանաչման հարցը: Ըստ նրա՝ եթե Հայաստանը ճանաչի ԼՂ անկախությունը, արդեն առաջ է գալիս բանակցությունների ձևաչափը փոխելու հարցը: «Արդեն պետք է կազմվի եռակողմ ձևաչափ: Ամեն ինչ կախված է նրանից, թե այժմ Հայաստանն ինչքան հեռու կգնա: Եվ զարմանալի է, որ Հայաստանը չի ընդունել մինչև հիմա ԼՂ անկախությունը, բայց նաև հասկանալի է, որ դա արվել է բանակցային գործընթացում առաջընթաց ապահովելու համար: Բայց եթե գործընթացն առաջ չգնա, դրվում է հետևյալ հարցը՝ իսկ ինչո՞ւ Հայաստանը չճանաչի: Ինչպե՞ս կարող է Հայաստանը պահանջել, որ ճանաչեն մյուս երկրները, եթե ինքը չի ճանաչել»,- ասաց Կռիլովը:
Ստեղծված իրավիճակն, ըստ նրա, կարող է բերել ստատուս քվոյի փոփոխության: Շատ բան, ըստ նրա, կարող է կախված լինել Հայաստանի իշխանություններից: «Ես կարծում եմ, որ ադրբեջանական կողմն այնքան հեռու կգնա, որ պատերազմ կսկսի ԼՂ-ում: Հիմա ամեն ինչ կախված է Հայաստանից, թե որքան բուռն կլինի Հայաստանի քաղաքական դաշտի և հասարակության արձագանքը»,- ընդգծեց նա: Ըստ Կռիլովի՝ Ռուսաստանը ձգտում է, որպեսզի իրավիճակը տարածաշրջանի սահմաններում չսրվի, ձգտում է, որ պատերազմ չլինի ԼՂ-ում: «Նույնն անում են մեր արևմտյան գործընկերները: Ոչ մեկի հետաքրքրությունների շրջանակում չէ, որ ԼՂ-ում նոր պատերազմ սկսվի: Ռուսական, ինչպես նաև ամերիկյան և ֆրանսիական դիվանագիտություններն ամեն ինչ կանեն, որ պատերազմ չսկսվի, իսկ հետո աշխատանքներ կտանեն բանակցային գործընթացում առաջընթաց ունենալու համար»,- կանխատեսեց մասնագետը: Նա նաև նկատեց, որ դժվար թե անգամ այս դեպքում Հունգարիան գնա ԼՂ ճանաչմանը, քանի որ այդ երկիրը մեծ կախվածություն ունի էներգակիրներից: Միաժամանակ նա նկատեց, որ Հունգարիան հայտնվեց վատ վիճակում. «Եթե Հունգարիան չստանա խոստացված միլիարդները, ընդհանրապես այդ արարքը մեծ հիմարություն կլինի»:
Պատասխանելով այն հարցին, թե ինչո՞ւ ուշացավ Ռուսաստանի հայտարարությունը դեպքի կապակցությամբ, Կռիլովն ասաց. «Պետք չէ սպասել, որ մենք կվազենք ամբողջ աշխարհից առաջ: Բայց այն, որ մեր պատասխանը եղավ համարժեք, դա հստակ է: Այն, որ Ռուսաստանը Հայաստանի անվտանգության վստահելի երաշխավորն է. և այն, որ Հայաստանը Ռուսաստանի համախոհն է, դա ամենակարևորն է»,- նշեց նա:
