Oddity Central պորտալը տեսանյութ է պատրաստել աշխարհի ամենազարմանահրաշ ճարտարապետական կառույցի վերաբերյալ: Աղբյուրի փոխանցմամբ՝ աշխարհի առաջին ապակեպատ տաճարը տեղակայված է Մալայզիայի հարավային Ջոհոր Բարու քաղաքում: Հինդուսական Arulmigu Sri Rajakaliamman տաճարը Մալայզիայի ամենահայտնի տեսարժան վայրն է: Այն նահանգի հնագույն տաճարներից է:
Տաճարն իր գոյությունը սկսել է 1922 թվականին՝ որպես փոքր ապաստան, այնուհետև տարիների ընթացքում ընդարձակվել: Այն առավել ընդարձակ չափերի է հասցվել 1991 թվականին, երբ գործող հոգևորականը տաճարի ղեկավարումը ստանձնել է իր հորից:
Ներկայիս հոգևորականի ջանքերով տաճարը վերակառուցվել է, ինտերիերն ու էստերիերը (այդ թվում` պատերը, առաստաղը, հատակը, շինության 90 տոկոսը) պատել գունագեղ ապակիներով:
Տաճարի ապակեպատումը իրականացվել է 2008 և 2009 թվականներին: Նախաձեռնության իրականացման համար անհրաժեշտ 1 մլն դոլարը ստացվել է ներդրողներից ու համայնքային ծրագրերից:
Տաճարը մեծ է, այն կարող է միաժամանակ 1500 հավատացյալի տեղավորել: