Rovio ընկերությունը հայտարարել է սեպտեմբերի վերջին Bad Piggies խաղի թողարկման մասին, որը Angry Birds-ի շարունակությունն է: Այս մասին հաղորդում է Euromag-ը:
Խաղը կթողարկվի սեպտեմբերի 27-ին` iOS, Android և Mac օպերացիոն համակարգերի համար: Windows 8, Windows Phone օպերացիոն պլատֆորմների համար խաղի տարբերակը կթողարկվի ավելի ուշ:
Նոր խաղում օգտատերը պետք է օգնի խոզերին հավկիթներ հավաքել: Ընկերությունը Bad Piggies-ը («վատ խոզուկներ») ներկայացնում է որպես նոր բրենդ:
Դեռևս վաղ է ասել` խոզուկները կդառնա՞ն նույնքան հայտնի, որքան զայրացած թռչունները: Պաշտոնական տվյալներով՝ այդ խաղը ներբեռնվել է ավելի քան 1 միլիարդ անգամ` տարբեր պլատֆորմների համար: Խաղի հերոսներ հանդիսացող թռչունները վերածվել են փափուկ խաղալիքների, հայտնվել մուլտիպլիկացիոն հեռուստաշոուում: Գործում է նույնիսկ թեմատիկ այգի:
Առաջին անգամ Angry Birds-ը թողարկվել է 2009 թվականի վերջին: Դրան հաջորդել են մի քանի տարբերակներ: Angry Birds-ի վերջին տարբերակի թողարկումը կայացել է մարտին:
