Նեթբուքեր արտադրող երկու խոշոր՝ Asus և Acer ընկերությունները դադարեցնում են այդ դասի սարքերի թողարկումը: Այս մասին հաղորդում է DigiTimes-ը:
Eee PC նեթբուքերից հրաժարվելու տեղեկությունը հաստատել է Asus-ի ղեկավար Ջերի Շենը: Eee PC-ին կփոխարինեն Transformer պլանշետները, որոնք հնարավոր կլինի նեթբուքի վերածել շարժական ստեղնաշարի միացմամբ: Acer-ի ներկայացուցիչները դեռևս պաշտոնապես չեն հաստատել նեթբուքերի արտադրությունից հրաժարվելու տեղեկությունը:
DigiTimes-ի աղբյուրների գնահատմամբ` նեթբուքերի շուկայից երկու ընկերությունների հեռանալու հետևանքով 2012-ի 4-րդ եռամսյակում նեթբուքերի և նեթթոփերի համար Intel Atom պրոցեսորների մատակարարումները կրկնակի կկրճատվեն:
Ենթադրվում է, որ նեթբուքերի արտադրությունից հրաժարվելու հիմնական պատճառը սարքերի պահանջարկի անկումն է:
