Грузия Online-ի փոխանցմամբ՝ Վրաստանի արտգործնախարար Գրիգոլ Վաշաձեն այսօր Թբիլիսիում հանդիպել է իր շվեդ և լեհ գործընկերներ Կառլ Բիլդտի ու Ռադոսլավ Սիկորսկու հետ: Հանդիպումից հետո կազմակերպված համատեղ մամուլի ասուլիսի ժամանակ Վաշաձեն հայտարարել է, որ Շվեդիայի ու Լեհաստանի արտգործնախարարների հետ քննարկել է ԵՄ-ի ու Վրաստանի միջև հարաբերություններին, ՆԱՏՕ-ին Վրաստանի ինտեգրմանը, ռուս-վրացական հարաբերություններին առնչվող հարցեր, ինչպես նաև տարածաշրջանում ստեղծված իրավիճակը.
«Բարձր գնահատական է տրվել ԵՄ-ի հետ մեր համագործակցությանը, մեր գրանցած առաջընթացին, եվրոպական ու եվրաատլանտյան կառույցներին ինտեգրվելու ճանապարհին մեր իրականացրած բարեփոխումներին»:
Ապա Վաշաձեն մեկնաբանել է տխրահռչակ Ռամիլ Սաֆարովի շուրջ Հայաստանի ու Ադրբեջանի միջև ստեղծված լարված իրավիճակը. «Վրաստանը շահագրգռված է, որ տարածաշրջանում տեղի չունենա այնպիսի բան, որը կխոչընդոտեր Հարավային Կովկասի երկրների համագործակցությանն ու զարգացմանը:
Վրաստանը շահագրգռված է, որ տարածաշրջանի բոլոր խնդիրները կարգավորվեն խաղաղ ճանապարհով, քանի որ յուրաքանչյուր լարվածություն տանում է դեպի պատերազմ, իսկ դա անընդունելի է թե՛ մեր կառավարության, թե՛ մեր ժողովրդի համար: Կողմերին կոչ եմ անում, որ նրանց միջև լարվածությունը չանցնի թույլատրելիի սահմանները:
Վրաստանի իշխանություններն ամեն ինչ անում են, որպեսզի Հայաստանն ու Ադրբեջանը չհատեն վերջին գիծը: Իր այդ ջանքերում Վրաստանը ստանում է նաև միջազգային օգնություն»:
Կառլ Բիլդտն իր հերթին հայտարարել է` թե՛ Հայաստանը, թե՛ Ադրբեջանը հասկանում են, որ չի կարելի ծայրահեղականացնել իրավիճակը. «Երկու կողմերն էլ հասկանում են, որ պատերազմը չի բխում իրենցից և ոչ մեկի շահերից, և միջազգային հանրությունը ձեռնարկում է անհրաժեշտ քայլեր»:
