Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է «Մենք մերոնցով» թերթի գլխավոր խմբագրի և նրա ամուսնու սպանության գործով դատավարությունը, որով ամբաստանյալի աթոռին են 2 անձինք` հայր ու որդի Հակոբ և Վաղարշակ Աբաջյանները:
Վաղարշակ Աբաջյանին մեղադրանք է առաջադրվել այն բանի համար, որ նա իր ծանոթ «Մենք մերոնցով» թերթի գլխավոր խմբագիր Ալվարդ Աբրահամյանին մոլորության մեջ գցելով` վերջինիս հետ մտերիմ հարաբերությունների մեջ գտնվող անձանցից խարդախությամբ առանձնապես խոշոր չափերի գումար հափշտակելու նպատակով, կեղծ խոստումներով Ալվարդ Աբրահամյանին, իսկ նրա միջոցով` նաև վերջինիս մտերիմներ Արմենուհի Ստեփանյանին, Վարդիշաղ Եղիազարյանին և Ազգանուշ Սրապյանին խաբելով` հայտնել է, թե իբր նրանց համար կարող է շուկայական գներից ակնհայտ ցածր գներով բնակարաններ ձեռք բերել Երևան քաղաքում:
Վաղարշակ Աբաջյանը, վերջիններիս վստահությունը չարաշահելով, Ալվարդ Աբրահամյանի միջոցով 2011թ. ամռանը Երևան քաղաքի Կենտրոն վարչական շրջանի տարածքում ստացել և Ազգանուշ Սրապյանից խարդախությամբ հափշտակել 5000 ԱՄՆ դոլար, Արմենուհի Ստեփանյանից` 12.000 ԱՄՆ դոլար, իսկ Վարդիշաղ Եղիազարյանից` 10.000 ԱՄՆ դոլար` ընդհանուր առմամբ խարդախությամբ հափշտակելով առանձնապես խոշոր չափերի` 9.936.000 ՀՀ դրամին համարժեք 27.000 ԱՄՆ դոլար գումար:
Հակոբ Աբաջյանին մեղադրանք է առաջադրվել այն բանի համար, որ նա հոր` Վաղարշակ Աբաջյանի կողմից 2011թ. ամռանն Ալվարդ Աբրահամյանի հետ մտերիմ հարաբերությունների մեջ գտնվող անձանցից խարդախությամբ առանձնապես խոշոր չափերի գումարի հափշտակությունը` խարդախությունը, թաքցնելու, միաժամանակ շահադիտական նկատառումներով հափշտակած գումարն անարգել տնօրինելու նպատակով կատարված խարդախության մասին կասկածներ ունեցող Ալվարդ Աբրահամյանին և նրա ամուսնուն` Յուրիկ Սրապյանին, առևանգելու, սպանության համար նպաստավոր վայր տեղափոխելու և նրանց սպանելու համար նախնական համաձայնության է եկել Վաղարշակ Աբաջյանի հետ, որից հետո` օգոստոսի 31-ին, ժամը 15-ի սահմաններում, Վաղարշակ և Հակոբ Աբաջյանները Յուրիկ Սրապյանի վստահությունը չարաշահելու միջոցով խաբեությամբ` Սևանա լճից խեցգետնի որս և առևտուր կազմակերպելու պատրվակով, Երևան քաղաքի Այգեստան 10-րդ փողոցի թիվ 22 հասցեում գտնվող` իրենց պատկանող առանձնատան բակից «Մերսեդես» մակնիշի 11 ՍՕ 138 համարանիշի ավտոմեքենայով Յուրիկ Սրապյանին առևանգել և տեղափոխել են Գեղարքունիքի մարզի Բերդկունք գյուղի` Սևանա լճի հարևանությամբ գտնվող կիսակառույց շինության տարածք:
Նշված շինությունում Հակոբ և Վաղարշակ Աբաջյանները հարվածելու և ձեռքերով խեղդելու եղանակով դիտավորությամբ, ապօրինաբար կյանքից զրկել` սպանել են Յուրիկ Սրապյանին, որից հետո Հակոբ Աբաջյանը` ստուգելով և համոզվելով, որ Յուրիկ Սրապյանը սպանված է, Վաղարշակ Աբաջյանի հետ Յուրիկ Սրապյանի դիակից հանել են հագուստները, դին գցել նշված շինության մոտ գտնվող փոսի մեջ և քարերով ծածկել, իսկ հագուստները նետել են Գավառ-Երևան ավտոմայրուղու տարբեր հատվածներում:
Այս գործով նախագահող դատավորն է Արշակ Վարդանյանը, որի որոշմամբ էլ այսօրվա դատավարությունը հետաձգվեց մինչև սեպտեմբերի 19-ը: Ի դեպ, այս գործով այսօր երկրորդ մեղադրող ներգրավվեց` դատախազ Հովսեփ Հովսեփյանը, որը մյուս մեղադրողի հետ դատարանում կպաշտպանի մեղադրանքը:
