Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին երեկ մասնակցել է Թբիլիսիի միջազգային օդանավակայանում նոր թռիչքուղու կառուցումը սկսելու արարողությանը: Այստեղ Սաակաշվիլին հայտարարել է, որ Թբիլիսիի օդանավակայանը պետք է լինի տարածաշրջանի ամենամեծ օդանավակայանը, և պետք է ամեն ջանք գործադրել դրան հասնելու համար:
Նոր թռիչքուղին կառուցելու է թուրքական TAV-Georgia ընկերությունը, որը ներդնելու է 65 միլիոն դոլար՝ 20 տարով երկարաձգելով օդանավակայանի ղեկավարման իրավունքը: Սաակաշվիլին ընդգծել է, որ յուրաքանչյուր օդանավակայանի համար ամենակարևորը հենց թռիչքուղին է, և դրանից հետո նոր գալիս է տերմինալը.
«Սակայն մենք կունենանք թե՛ նոր թռիչքուղի, թե՛ նորացված տերմինալ: Թբիլիսիի օդանավակայանը պետք է լինի տարածաշրջանի առաջատարը: Մենք մտադիր ենք պայքարել Թբիլիսիի օդանավակայանում տոմսերի բարձր գների դեմ: Անթույլատրելի է, որ Կիև մեկնելու տոմսն արժենա 600 դոլար:
Սեպտեմբերի 27-ին էլ գործարկվելու է Քութայիսի օդանավակայանը: Այն մշտապես կնվազեցնի ավիատոմսերի գինը: Շուտով կվերացվի ԵՄ-ի հետ գործող վիզային ռեժիմը, և ես ցանկանում եմ, որ Վրաստանի քաղաքացիները Եվրոպա կարողանան մեկնել մատչելի գներով: Դա իմ գլխավոր առաջադրանքն է: Սպասե՛ք մրցակցության»:
