Արցախի Հանրապետության նախագահ Բակո Սահակյանը սեպտեմբերի 3-ին ընդունել է մոտ հինգ տասնյակ լիբանանահայ գործարարների:
Իր խոսքում նախագահը նշել է, որ լիբանանահայությունը մեր Սփյուռքի ամենակայացած և կազմակերպված համայնքներից մեկն է, որը միշտ կանգնած է եղել Մայր Հայաստանի ու Արցախի կողքին և մեծ ներդրում ունի Լեռնային Ղարաբաղի Հանրապետության զարգացման, նրա առջև ծառացած տարբեր խնդիրների լուծման գործում:
Երկրի ղեկավարն ընդգծել է, որ Արցախում չափազանց կարևորում են Լիբանանի հայ համայնքի հետ կապերի ընդլայնումն ու խորացումը՝ հավելելով, որ այստեղ ստեղծված են բոլոր անհրաժեշտ պայմանները գործարարության զարգացման, քաղաքակիրթ և փոխշահավետ համագործակցության համար:
Հանդիպման վերջում նախագահ Սահակյանը պատասխանել է ներկաների կողմից բարձրացված հարցերին:
