NASA ամերիկյան տիեզերական գործակալությունը Երկիրը աստղակերպերի հետ հնարավոր բախումներից փրկելու տարբերակներ է մշակում «Արմագեդոն» ֆիլմում Բրյուս Ուիլիսի մարմնավորած հերոսի օրինակով:
Ինչպես հաղորդում է MIGnews գործակալությունը, վիրտուալ իրականության լաբորատորիայում NASA-ն արդեն մշակում է աստղակերպի վրա վայրէջքի ծրագիր: Նրանց խնդիրը պետք է լինի փոխել տիեզերական օբյեկտի հետագիծը՝ Երկիրը նրա հետ բախումից փրկելու համար: Առայժմ, սակայն, փորձին մասնակցող տիեզերագնացները հաջողության չեն հասնում:
Վիրտուալ իրականության լաբորատորիայում այժմ փորձում են պարզել՝ թե որքան ժամանակ է անհրաժեշտ տիեզերագնացին տիեզերնավից աստղակերպի վրա անցնելու համար:
Առայժմ աստղակերպի վրա վայրէջք կատարել հաջողվել է միայն Բրյուս Ուիլիսին «Արմագեդոն» ֆիլմում: «Բրյուսի առջև խնդիր էր դրված աստղակերպը կտորների բաժանել և կանխել նրա բախումը Երկրի հետ: Եվ ի դեպ, դեռ հարց է՝ արդյո՞ք դա արդյունք տալիս է, քանի որ բեկորները նույնպես վտանգավոր են»,- ծրագրի մասին պատմում է նախագծի մենեջեր, NASA-ի տիեզերագնաց Մայքլ Քերնհարթը:
Նրա խոսքրով՝ տիեզերագնացների վարէջքի համար սարքի նախատիպն արդեն պատրաստ է: Այնուամենայնիվ, գիտնականները նշում են, որ պատասխան չի տրվել ամենագլխավոր հարցին. ի՞նչ անել զրոյական գրավիտացիայի հետ: Չէ՞ որ աստղակերպի վրա, ի տարբերություն Լուսնի, ձգողականության ուժը գործնականում բացակայում է:
