«Բիթլյան» տուրիզմը Լիվերպուլի աճող տնտեսության հիմքն է` տասնյակ ընկերություններ քաղաքի հյուրերին առաջարկում են էքսկուրսիաներ լեգենդար քառյակի փառքի վայրերով:
Սակայն տեղացիները վերջին շրջանում ավելի ու ավելի հաճախ են արտահայտում իրենց դժգոհությունները:
Օրինակ` 74-ամյա Քեթլին Հյուզը, որն ապրում է Ջորջ Հարիսոնի նախկին տանը (12 Arnold Grove), սարսափելի բարկացած է զբոսաշրջիկների վրա, որոնք վաղ առավոտյան հավաքվում են նրա պատուհանների տակ:
Նրա խոսքով` ամռան ամիսներին զբոսաշրջիկներից «ընդհանրապես ազատում չկա»:
«Հանգստյան օրերին մենք չգիտենք` ուր փախչենք նրանցից: Նրանք գալիս են ու զբոսնում անգամ գիշերվա 2-ին»,- հավելել է թոշակառուն:
Քեթլինի հարևաններն արդեն երկու անգամ դիմել են քաղաքային խորհրդին` խնդրելով կանոններ սահմանել, որոնցով պետք է առաջնորդվեն զբոսաշրջային գործակալությունները, սակայն դեռ պատասխան չեն ստացել: Այս մասին հայտնում է Travel-ը:
Փոլ Մակքարտնիի տունը Forthlin Road-ում ժամանակին գնել է Ազգային հիմնադրամն ու այն դարձրել է տեսարժան վայր: Համաձայն թանգարանի ու քաղաքի միջև կնքված պայմանագրի` ամեն օր այդտեղ կարող են գալ սահմանափակ թվով ավտոբուսներ:
Իր հերթին, Լիվերպուլի քաղաքային խորհրդի ներկայացուցիչը հայտարարել է, որ տեղացիների ամեն բողոք քննարկվում է ու արվում է ամեն ինչ` տեղացիներին անհանգստություն չպատճառելու համար:
