Մեքսիկայի «Տիխուանա» նարկոկարտելի ներկայացուցիչ Էդուարդո Արելիանո Ֆելիքսը Մեքսիկայից արտահանձնվել է ԱՄՆ-ին: Այս մասին հաղորդում է Agence France-Presse-ը:
ԱՄՆ իշխանությունները Արելիանո Ֆելիքսին մեղադրում են ռեկետի, փողերի լվացման և թմրանյութերի վաճառքի մեջ: 55-ամյա նարկոբարոնը ձերբակալվել է Տիխուանայում՝ Մեքսիկայի հյուսիս-արևմուտքում 2008թ. հոկտեմբերին: 2010թ. որոշում կայացվեց նրան արտահանձնել ԱՄՆ-ին, սակայն այդ որոշման բողոքարկման փուլում Արելիանո Ֆելիքսը մնաց հայրենիքում:
Ենթադրվում է, որ Սան Դիեգոյում Արելիանո Ֆելիքսը երեքշաբթի կկանգնի ԱՄՆ-ի դաշնային դատարանի առաջ:
«Տիխուանա» կարտելը տեղակայված է համանուն քաղաքում: Այն հիմնվել է 1980-ական թվականներին և ղեկավարվել Արելիանո Ֆելիքս 6 եղբայրների կողմից: Այն բանից հետո, երբ 2002թ. Բենջամին Արելիանո Ֆելիքսը ձերբակալվեց, իսկ նրա եղբայրը՝ Ռամոնը, սպանվեց ոստիկանության հետ փոխհրաձգության ժամանակ, կարտելը սկսեց կորցնել իր հեղինակությունը:
Եղբայրներից Բենջամին Արելիանո Ֆելիքսն ԱՄՆ-ին է արտահանձնվել 2011թ. ապրիլին, իսկ մեկ տարի անց դատապարտվել 25 տարվա ազատազրկման և 100 մլն դոլար տուգանքի:
