«Փակ շուկա»-ում շինաշխատանքները շարունակվում են: Զուգահեռաբար շարունակվում են խոսակցություններն այն մասին, որ իրականացվող աշխատանքներն ապօրինի են, քանի որ դրանք մեծ թափով են ընթանում:
«Առաջին լրատվական»-ին մշակույթի նախարարության հասարակայնության հետ կապի և լրատվության վարչությունից տեղեկացրեցին, որ հունիսի 27-ին հաստատվել է «Թիվ 1 Շուկա» ՍՊԸ տրամադրած նախագիծը «Փակ շուկա»-ի ստորգետնյա հարկերի իրականացման և պահպանված հիմքերի հատվածների ուժեղացման նախագիծը: Հարցին, թե այլ նախագծեր չկա՞ն, որոնք ներկայացվել են և հաստատվել, պատասխանեց, որ հաստատված այլ նախագծեր չկան: Սակայն աշխատակցուհին չբացառեց, որ շենքի այլ հատվածների վերաբերյալ նախագծեր են ներկայացվել:
Հիշեցնենք, որ ամիսներ առաջ ՀՀ մշակույթի նախարարի և Երևանի քաղաքապետի համատեղ հրամանով ստեղծվել էր հանձնաժողով, որը հրատապ պետք է ուսումնասիրեր ստեղծված իրավիճակը, ներկայացներ համալիր առաջարկություններ իրականացվելիք միջոցառումների վերաբերյալ: Հանձնաժողովը որոշում կայացրեց, որ «Թիվ 1 Շուկա» ՍՊԸ-ն պետք է իրականացվելիք աշխատանքների վերաբերյալ նախագիծ ներկայացնի մշակույթի նախարարություն՝ շինաշխատանքների թույլատրելիությունը որոշելու նպատակով:
