ԱԺ ՀՀԿ խմբակցության պատգամավոր Կարինե Աճեմյանը «Ժողովուրդ»-ի հետ զրույցում ասաց, որ այսօր պետք է բոլոր ուժերը մոբիլիզացնել գյուղերի վրա, որպեսզի գյուղացին չարտագաղթի:
– Ձեր կոալիցիոն նախկին գործընկեր ԲՀԿ-ն այս ամենի ելքը տեսնում է կառավարության փոփոխության մեջ:
– Մենք բազմիցս խոսել ենք ու մեր տեսակետները հայտնել այդ ուղղությամբ, մենք հակված ենք նրան, որ աշխատենք: Մնացածը ԲՀԿ-ի խնդիրն է: Բայց ներսում այս պահին նման խնդիր չենք տեսնում, և չի էլ քննարկվել կառավարության հարցը: Շուտով կառավարությունը հաշվետվություն է ներկայացնելու Աժ, այդ հաշվետվությունը բոլոր խմբակցությունները և’ լսելու են, և’ մասնակցելու են, որի ժամանակ էլ բոլորի դիրքորոշումը պարզ կլինի:
– ԲՀԿ-ն առաջ է քաշել նաև վարչապետի հրաժարականի հարցը, ի՞նչ է այդ ամենի մասին մտածում ՀՀԿ-ն:
– Գիտեք, ավելի շատ մամուլում է այդ հարցը քննարկվում: Եթե դժգոհ են, կարող են իրենց դժգոհությունները ներկայացնել, պետք չէ այդքան թեժացնել այդ խոսակցությունները: Նման հարց ՀՀԿ-ում չի քննարկվել, մեր դիրքորոշումը հետևյալն է. մենք չենք ասում, որ իդեալական կառավարություն ենք, բայց մինչև տարեվերջ կներկայացնենք, թե ինչ է արվել, ինչը շատ կարևոր փաստաթուղթ է, որը պետք է բոլորով քննարկենք:
