Մայրաքաղաքի բոլոր ուսումնական հաստատությունների առջև թարմացվել են հետիոտնային անցումների ու ճանապարհային այլ գծանշումները:
Նոր ուսումնական տարվան ընդառաջ` ՀՀ ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը այսօր լրագրողների հետ հանդիպմանը ներկայացրեց ՀՀ ճանապարհային ոստիկանության կատարած աշխատանքները հատկապես հանրապետության դպրոցների հետ:
Ճանապարհապարեկային ծառայության բաժնի պետի ներկայացմամբ` ՃՈ-ն այս տարի հանդիպումներ է ունեցել հանրապետության մարզերի և հատկապես մայրաքաղաքի գրեթե բոլոր դպրոցների տնօրենների հետ, և ոչ միայն ուսումնասիրվել է դպրոցների տարածքներում հետիոտնային անցումների ավելի նպատակահարմար տեղում գծանշումների հարցը, այլև ճանապարհային ոստիկանությունը մանկավարժներին հորդորել է անմիջապես սեպտեմբերի 1-ից աշակերտներին սովորեցնել պահպանել ճանապարհային երթևեկության կանոնները:
Նորիկ Սարգսյանի խոսքով` իրենք նաև կաջակցեն այն դպրոցներին, որոնք ցանկություն կունենան ճանապարհային երթևեկության կանոնների պահպանման դասընթացներ վարել. դասընթացները կվարեն հենց ՃՈ աշխատակիցները:
Ճանապարհապարեկային ծառայության բաժնի պետը ևս մեկ անգամ բոլոր վարորդներին հորդորում է հատկապես ուսումնական տարվա առաջին մեկամսյակում լինել առավել զգոն և առավել զիջող` հատկապես քաղաքի այն հատվածներում, որտեղ կան ուսումնական հաստատություններ, իսկ հետիոտներին` ճանապարհը հատել միայն հետիոտնային անցումներով:
Ինչ վերաբերում է սեպտեմբերի 1-ին, ապա Ճանապարհային ոստիկանության աշխատակիցները, ինչպես նաև անչափահասների գործերով տեսուչներն ու համայնքային ոստիկանները այդ օրը հատուկ պարեկային ծառայություն կիրականացնեն դպրոցների տարածքներում` առավոտյան ժամը 8.00-ից մինչև 13.00-ը:
