«168 Ժամ»-ը գրում է, որ շրջանառվող լուրերի համաձայն, նախագահական ընտրություններից հետո կոալիցիայի կազմում են ընդգրկվելու նաև ՀՅԴ-ն, ԲՀԿ-ն և «Ժառանգությունը»: «Նոր ժամանակներ» կուսակցության նախագահ Արամ Կարապետյանից թերթի թղթակիցը հետաքրքրվել է` որքանո՞վ են իրատեսական նման զարգացումները:
«Ոչ, չեմ համարում: Նախ պետք է տեսնենք, թե ձեր թվարկած կուսակցություններն ինչպե՞ս կդրսևորեն իրենց նախագահական ընտրությունների ժամանակ, հետո միայն կխոսենք հավանական կոալիցիայի մասին: Բայց մի բան հաստատ է. ինչի՞ շուրջ պետք է հավաքվեն այդ ուժերը… Եթե իշխանության շուրջ են հավաքվելու, ասեմ, որ իշխանությունը Հայաստանում Սերժ Սարգսյանի ու որոշ օլիգարխների ձեռքում է, նույնիսկ ուժայինները դեր չեն խաղում: Ինչի՞ շուրջ պիտի հավաքվեն, արտաքին քաղաքականությա՞ն, ԼՂՀ հանձնմա՞ն, հայ-թուրքական հարցի՞, Սիրիայի՞, Լիբանանի՞, Իրանի՞, ինչի՞ շուրջ: Հայաստանի քաղաքական դաշտում կուսակցություններն, ըստ էության, դերակատարում չունեն: Դեր են խաղում կուսակցությունները ներկայացնող առանձին անհատներ` Սերժ Սարգսյանը, Գագիկ Ծառուկյանը, Արթուր Բաղդասարյանը… Ինչի՞ շուրջ պետք է միավորվեն, հավաքվեն, երբ գնալով նոր մարտահրավերներ են առաջ գալիս, որոնք պատասխաններ են ենթադրում, բայց դրանք, ինչպես տեսնում ենք, չկան»,- պատասխանել է Արամ Կարապետյանը:
