Այսօր լրագրողների հետ հանդիպմանը «Սոցիալական գովազդի մշակույթը խրախուսման կարիք ունի. խախտվում է Գովազդի մասին ՀՀ օրենքը» թեմային անդրադարձան «Աուդիո-Վիզուալ լրագրողների ասոցիացիայի» նախագահ Արզուման Հարությունյանն ու «Սոցիալական գովազդի վիրտուալ փառատոնի» հաղորդակցման հարցերով խորհրդատու Մարիամ Մովսիսյանը:
Արզուման Հարությունյանը նշեց` ենթադրաբար, սոցգովազդը Հայաստանում ցածր մակարդակի վրա է և ոչինչ չի արվում դրա զարգացման համար: Բանախոսի փաստմամբ` ամբողջ աշխարհում այս գովազդն ունի իր ուրույն տեղը և խրախուսվում է պետության կողմից, իսկ Հայաստանում սոցիալական խնդիրների հանդեպ վերաբերմունքը դուրս է մնացել պետության և հասարակության ուշադրությունից:
«Հասարակությունն, ունենալով խնդիրներ, դրանց լուծման ճանապարհները չի կարողանում տեսնել, դա չի կարողանում անել նաև պետությունը: Ելքեր շատ կան. պետք է սոցիալական գովազդը տարածվի անվճար և լինի առաջնային: Սոցգովազդի օրենքն այսօր թերի է: Չկա հստակ սահմանումը, չկան մեխանիզմները, թե ով է սահմանելու, ով է որոշելու, թե դա սոցիալական գովա՞զդ է, թե՞ ոչ: Պետությունն իր վրա է վերցնում արտադրությունը և հեռարձակում, այն ոչնչով չի տարբերվում առևտրային գովազդից: Սա լավագույն մոդելն է, սակայն Հայաստանն ընտրեց երկրորդ մոդելը` պետական մեխանիզմների ճնշման տակ արտադրության մեջ միջազգային կառույցներին
ներգրավեցին»,- մեկնաբանեց բանախոսը:
Ա. Հարությունյանն ասաց, որ անցյալ տարի երկար չարչարանքից հետո հրամանագիր արձակվեց սոցգովազդի հայեցակարգի մշակման վերաբերյալ, այն բոլոր օղակներով անցավ և լավ կաշխատեր, բայց կասեցվել է այս գործընթացը: Բացատրելով հայեցակարգի էությունը` Արզուման Հարությունյանը տեղեկացրեց, որ դրա գործարկման դեպքում կոմերցիոն լրատվամիջոցներին չենք զրկում գումար վաստակելու հնարավորությունից:
«Այսինքն` եթե հեռուստաընկերություններն ունեն գովազդի համար ժամանակ, մենք առաջարկում ենք սեփական հաղորդումների պատրաստման հաշվին ժամում մեկուկես րոպե տրամադրել սոցիալական գովազդին: Ստացվում է շահութաբեր համագործակցություն: Մենք ստեղծում ենք հատուկ հանձնաժողով` կազմված հեռարձակողներից և կառավարության ներկայացուցիչներից` որոշելու համար, թե որն է սոցիալական գովազդը: Ցավոք, ունենալով լավ մոդել` կառավարության հավանությանն արժանանալուց հետո այն առաջ չգնաց. պատճառը որն է` չեմ կարող ասել»,- ասաց Արզուման Հարությունյանը:
Մարիամ Մովսիսյանն իր հերթին տեղեկացրեց, որ սեպտեմբերից մեկնարկում է սոցիալական գովազդի վիրտուալ փառատոնը: Բանախոսի խոսքով` այն ստեղծվել է լրատվամիջոցների այլընտրանքային ծրագրի շրջանակում:
«Այդ ծրագրով ուզում ենք խրախուսել սոցգովազդի տարածումը` որպես սոցիալական խնդիրների լուծման ճանապարհ: Առաջին տարին է, որ իրականացվելու է այս փառատոնը: Այն ունենալու է մի քանի փուլ: Ծրագիրն առաջին փուլում է, և բոլոր ցանկացողներին հրավիրում ենք մասնակցելու անվճար հնգօրյա դասընթացի, որի շրջանակում կծանոթանան սոցիալական գովազդի հիմունքներին, սոցիալական խնդիրներին և կստանան սոցիալական գովազդի պատրաստման նախնական գիտելիքներ»,- նկատեց Մարիամ Մովսիսյանը:
