Կենդանիների պաշտպանները հայտարարում են Սալվադորի մերձափնյա շրջաններում եզակի համարվող ծովային կրիաների ավելի քան 45 000 ձվի ոչնչացման մասին: Շաբաթվա սկզբին Սալվադորում տեղի էր ունեցել 7,4 մագնիտուդ ուժգնությամբ երկրաշարժ, որի էպիկենտրոնը Ուսուլութա քաղաքից 125 կմ հեռավորության վրա էր: Ոչնչացվել են հազարավոր ձվեր, և նորածին կրիաներ են սատկել երկրաշարժի և օվկիանոսի` տասնյակ մետր բարձրության հասնող բարձր ալիքի պատճառով:
Կենդանիների մոտ 150 պաշտպաններ լծվել են այդ ձվերը հավաքելու և կործանումից փրկելու գործին, սակայն ենթարկվել են օվկիանոսի ալիքների հարվածներին, իսկ նրանցից երեքը նույնիսկ վնասվածքներ են ստացել:
Ծովային կրիաները եզակի նավիգացիոն հատկություն ունեն, նրանք նույնիսկ տարիներ անց կարող են առանց սխալվելու վերադառնալ իրենց ծննդավայրը: Գիտնականները գտնում են, որ նրանք կողմնորոշվում են երկրի մագնիսական դաշտի միջոցով:
