«Ամեն ինչ վկայում է այն մասին, որ Գյումրիի քաղաքապետ Վարդան Ղուկասյանի որդին` Սպարտակ Ղուկասյանը, այս անգամ էլ չի ենթարկվի քրեական պատասխանատվության և չոր դուրս կգա վերջին փոխհրաձգության աղմկալի պատմությունից»,- գրում է «Հայկական ժամանակ»-ը և հավելում.
«Խնդիրն այն է, որ մի կողմից ոստիկանությունը խուզարկություններ է անցկացրել Վարդան Ղուկասյանի տանը` նրա որդուն հայտնաբերելու նպատակով, մյուս կողմից` նույն ոստիկանությունը հայտարարում է, որ Սպարտակ Ղուկասյանը ՀՀ-ում չէ: Նշանակում է` խուզարկություններն իրականացվում են ընդամենը տպավորություն ստեղծելու համար, թե քաղաքապետի որդուն փնտրում են: Եթե գիտեն, որ նա հեռացել է Հայաստանից, ապա ամենևին դժվար չէ պարզել սահմանապահ ծառայությունից` սահմանը հատե՞լ է, թե ոչ: Եվ ընդհանրապես տպավորություն է ստեղծվում, որ իրավապահները ժամանակ են ձգում` Սպարտակ Ղուկասյանին հայտնաբերելու կամ չհայտնաբերելու հստակ ցուցում ստանալու համար»:
