Լիբիայի ՆԳ նախարար Ֆաուզի Աբդել-Ալին, ով նախօրեին հայտարարել էր իր հրաժարականի մասին, փոխել է միտքը և որոշել է մնալ իր պաշտոնում: Այս մասին հայտնել է Agence-France Presse-ը:
«Երբ ես հրաժարականի դիմում էի ներկայացնում, կարծում էի, որ դա կթեթևացնի երկրում տիրող իրավիճակը: Սակայն, կարծես թե ճիշտ հակառակն է, իմ հրաժարականը միայն կբարդացնի անվտանգության ոլորտում տիրող իրավիճակը: Ես որոշել եմ հետ վերցնել հրաժականի մասին իմ դիմումը»,- հայտարարել է նախարարը:
Աբդել-Ալին չի նշել, թե ինչպես կարող է տուժել երկրի անվտանգությունն իր հրաժարականի դեպքում:
Հիշեցնենք, որ Լիբիայի ՆԳ նախարարը հրաժարականի դիմումը ներկայացրել էր Լիբիայի համընդհանուր ազգային կոնգրեսի քննադատությունից հետո, այն առնչությամբ, որ կառավարությունը համապատասխան միջոցներ ձեռք չի առնում, որպեսզի դադարեցնի հարձակումները սուֆիական սրբությունների վրա:
