Լիբիայի կառավարությունը, կարծես, վերադառնում է դառը իրականությանը: Նրանք ստիպված են եղել հայտարարելու, որ սպանվածների թիվը բախումների ժամանակ հասել է հարյուրների: Ըստ պաշտոնական տվյալների` զոհվել է 111 զինվորական և 189 քաղաքացիական անձ: Այս մասին հաղորդել է France Presse գործակալությունը: Ամենաշատ զոհվել են Բենղազիում` 104 քաղաքացիական անձ և 10 զինվորական:
Սակայն այլ աղբյուրներ մի քանի անգամ ավել թվեր են ներկայացնում: Al-Arabia հեռուստաալիքը հայտնել է 800 զոհի մասին, Human Rights Watch-ը` 600-ի:
Լիբիական իշխանությունները նաև հայտնել են, որ իրենք օդային ռմբակոծության են ենթարկել միայն այն ռազմական օբյեկտները, որտեղ վտանգ կար, որ ցուցարարները կարող են տիրանալ այդ զենքին, իսկ բնակավայրերի վրա ոչ մի ռումբ չի գցվել: Մամուլի ասուլիսի ժամանակ մի քանի պաշտոնյա անընդհատ շեշտում էին, որ ցուցարարները գտնվել են հալյուցինոգեն դեղերի ազդեցության տակ` այլ կերպ չկարողանալով բացատրել մարդկանց դժգոհության պատճառը:
