Ինչպես հաղորդում է CNN-ը, ԱՄՆ նախագահի աշխատակազմի նախկին ղեկավար Ռամ Էմանուելը հաղթանակ է տարել Չիկագոյում կայացած քաղաքապետի ընտրությունների ժամանակ: Էմանուելի հաղթանակն ավելի քան վստահ է եղել, քանի որ հավաքել է 55%, և դրանով վերացել է երկրորդ փուլի անհրաժեշտությունը:
Նրա հիմնական հակառակորդը՝ Չիկագոյի դպրոցների կառավարման վարչության նախկին ղեկավար Ջերի Չիկոն, հավաքել է 25%: Այս թվերը գրեթե փոփոխության ենթակա չեն, քանի որ չէր հաշվարկվել քվեաթերթիկների շատ փոքր մասը:
Ռամ Էմանուելին շնորհավորել է նախագահ Բարաք Օբաման. «Ես ցանկանում եմ շնորհավորել Ռամ Էմանուելին արժանի հաղթանակի համար: Որպես նրա ընկեր և Չիկագոյի բնակիչ` ես չափազանց հպարտ եմ: Ռամը հրաշալի քաղաքապետ կլինի»,- ասված է Բարաք Օբամայի շնորհավորական ուղերձում:
Հիշեցնենք, որ Ռամ Էմանուելին սկզբնապես չէին գրանցում որպես թեկնածու, քանի որ նա նախորդ մեկ տարվա ընթացքում չէր ապրել Չիկագոյում: Եվ միայն դատարանի որոշումից հետո նրա անունը մտցրին ընտրական քվեաթերթիկի մեջ: