«Մանկական Նոր ալիք-2012» միջազգային երաժշտական մրցույթում այս տարի Հայաստանն ուներ երկու մասնակից, որոնցից մեկը զբաղեցրել է 2-րդ, մյուսը` 6-րդ հորիզոնականը: Մոսկովյան ժյուրին չի կարողացել ընտրել երկու մասնակիցներից մեկին և երկուսին էլ թույլ է տվել մասնակցել մրցույթին: Երկրորդ տեղը գրաված Սոնա Գյուլխասյանը այսօր լրագրողների հետ հանդիպմանը ասաց՝ տխուր է միայն այն պատճառով, որ մեկ միավորով է 1-ին տեղը զիջել:
Մրցույթի հայաստանյան պրոդյուսեր Իրինա Վարդանյանն էլ հավելեց, որ երեխաները շատ լավ էին նախապատրաստվել Հայաստանում, մրցույթին էլ փայլուն ելույթ ունեցան. «Մենք հպարտ ենք մեր մասնակիցներով, նրանք կարողացան Հայաստանը ըստ արժանվույն ներկայացնել օտար բեմում»:
ՀՀ վաստակավոր արտիստուհի Նադեժդա Սարգսյանն էլ հաստատեց ռուսական թերթերի այն տեղեկատվությունը, որ առաջին տեղը գրաված մասնակիցը սխալ նոտաներով է երգել. «Այնտեղ էլ խոսակցություններ կային, որ մենք պիտի առաջինը լինեինք, ես կարծում եմ` ոչ միայն առաջինը, այլև Գրանտ պրիի էինք արժանի»:
Արինային, ով գրավել էր 6-րդ հորիզոնականը, մրցույթի ժամանակ արև էին անվանում: Նադեժդա Սարգսյանը ծիծաղելով պատմեց, որ նա հայերենով իտալացուն փորձում էր ինչ-որ բան բացատրել, շատ աշխույժ էր և, որ ամենակարևորն է, երկու երգն էլ երգեց հայերեն:
