2009-ին ճգնաժամի ազդեցության հետևանքով Fitch-ը ՀՀ վարկանիշը «BB»-ից իջեցրեց «BB-», իսկ վերջին գնահատականը չի փոփոխվել՝ չնայած ինչ-որ դրական շարժեր նշել է: Տնտեսագետ Սամվել Ավագյանն «Առաջին լրատվական»-ի հետ զրույցում հայտնեց, որ դա նշանակում է, որ իրենք ճգնաժամի կրկնման հավանականությունը ու Հայաստանի խոցելիությունն այդ ճգնաժամի նկատմամբ դեռևս բարձր են գնահատում:
«ՀՀ-ի բացասական հիմնական դիրքը արտաքին պարտքի աճն է, որովհետև մակրոտնտեսական ցուցանիշներով՝ գնաճ, դեֆիցիտ, Հայաստանն ունի բարելավում: Բայց կապված նրա հետ, որ արտաքին պարտքն է աճել, շարունակում է աճել ու մոտենում է վտանգավոր մակարդակի, երևի այդ հանգամանքները հաշվի առնելով՝Fitch-ը չի բարձրացրել ՀՀ վարկանիշը, և վճարունակության խնդիր է դիտվում»,- ասաց Ս.Ավագյանը:
Հարցին՝ միջազգային կառույցները վարկանիշը հաշվի առնո՞ւմ են նոր վարկ տրամադրելու դեպքում, կարո՞ղ է դա ազդել, որ ՀՀ-ին վարկ չտրամադրեն, Ս.Ավագյանը պատասխանեց. «Fitch-ի և Modus-ի գնահատականներն ազդում են պարտատոմսերի դիրքերի վրա, բայց մենք այսպես թե այնպես չունենք արտարժույթով պարտատոմսեր: Մեր գանձապետական պարտատոմսերը դրամով են թողարկվում: Իսկ ՀԲ-ն և ԱՄՀ-ն ունեն իրենց գնահատականները և չեն առաջնորդվում Fitch-ի և Modus-ի գնահատականներով»:
