Թուրքիայի արտաքին առևտրի նախարարը հայտարարել է, որ Լիբիայում հրոսակախմբերը հարձակվել են թուրքական ընկերությունների վրա և թալանել դրանք: Այս մասին հաղորդում է Zaman-ը:
Թուրքական ընկերությունները մեծ ներդրումներ են կատարել այս երկրում: Մոտավոր հաշվարկներով այդ ներդրումների ընդհանուր թիվը կազմում է 15 մլրդ դոլար: Նախարար Զաֆեր Չաղլայանն ասել է, որ թուրքերի գույքի վրա կատարված հարձակումներից Թուրքիայի քաղաքացիները չեն տուժել: Նա նաև ավելացրել է, որ հարձակման է ենթարկվել մոտավորապես 14 ընկերություն:
«Առաջին լրատվականը» տեղեկացրել էր, որ Թուրքիան փորձում է դուրս բերել իր քաղաքացիներին Լիբիայից, սակայն դա դեռ չի հաջողվում, քանի որ թուրքական օդանավերը չեն կարողանում վայրէջք կատարել Լիբիայում: Թուրքական լրատվամիջոցները նաև տեղեկացնում են, որ լիբիական իշխանությունները այս բախումները հրահրելու մեջ մեղադրում են նաև Թուրքիայի քաղաքացիներին, և թուրքական ինքնաթիռների` Լիբիա ժամանելու դժվարությունները պայմանավորված են հենց այդ լարված հարաբերություններով: Մենք տեղեկացրել էինք նաև, որ ձերբակալված օտարերկրացիների թվում կան նաև Թուրքիայի քաղաքացիներ: