Լոնդոնում անցկացված օլիմպիական խաղերում բրոնզե մեդալ նվաճած հայ ծանրորդուհի Հռիփսիմե Խուրշուդյանն իր առջև խնդիր է դրել ավելացնել սեփական քաշը: Այս մասին այսօր լրագրողների հետ հանդիպմանն ասաց ծանրորդուհին՝ նշելով, որ դա հնարավորություն կտա մրցել ավելի ծանր քաշ ունեցողների հետ: Հիշեցնենք, որ Խուրշուդյանը բրոնզե մեդալակիր էր դարձել գերծանրքաշայինների մրցաշարում՝ առաջ անցնելով իրենից ավելի ծանր քաշ ունեցող մրցակցուհիներից:
Հռիփսիմե Խուրշուդյանը նշեց, որ բարձր տրամադրություն է ունեցել օլիմպիական խաղերի ժամանակ: «Բարձր տրամադրությամբ եմ իջել հարթակից, բայց չգիտեի դեռ, որ բրոնզե մեդալակիր եմ: Երկրորդ մոտեցման ժամանակ չհաշվեցին բարձրացրած քաշը, երրորդ մոտեցմանը շատ լավ էի տրամադրված հոգեբանորեն, գնացի ու բարձրացրի»,- պատմեց նա: Ի դեպ, Հռիփսիմե Խուրշուդյանն այս տարի նախատեսում է ամուսնանալ: 2013 թվականին նա կհանգստանա, իսկ 2014 թվականի գարնանից կվերադառնա մեծ սպորտ և կմասնակցի միջազգային մրցաշարերին:
Ծանրամարտի կանանց հավաքականի գլխավոր մարզիչ Արտաշես Ներսիսյանն այսօրվա ասուլիսին անդրադարձավ Մելինե Դալուզյանի պարտությանը: Ըստ նրա՝ Մելինեն ավելի պատրաստված էր, քան Հռիփսիմեն, բայց նրա մոտ հոգեբանական խնդիր կային: «Մելինեն ավելի բարձր կարգավիճակում էր, բայց վարագույրից այն կողմ զարմանալի վարք դրսևորեց, հոգեբանական արգելակում ունեցավ և չկարողացավ այդ վիճակից դուրս գալ: Ասաց՝ ծանրաձողը ոնց որ մի տոննա լինի՝ գետնի մեջ խրված, չեմ կարողանում բարձրացնել: Մենք գնացել էինք ոսկե մեդալի համար, նա ուժեղ էր և կարող էր դա ունենալ, բայց մրցումներին մասնակցելը մոռացել էր»,- ասաց գլխավոր մարզիչը: Ըստ նրա՝ առաջիկայում Մելինե Դալուզյանն ակտիվորեն կմասնակցի մրցաշարերին, որպեսզի հոգեբանական արգելքները հաղթահարվեն:
Երկրորդ մարզիչ Փաշիկ Ալավերդյանն էլ, անդրադառնալով պարտություններին ու ծանրամարտի ֆեդերացիայի նախագահի և մարզիչների հրաժարականի մասին խոսակցություններին, ասաց, որ առաջիկայում ֆեդերացիայում նիստ կգումարեն: Ըստ նրա՝ եթե մեղավորներ ու թերացողներ հայտնաբերվեն, բնականաբար, կքննարկվի հրաժարականների հարցը:
