Ազգային վիճակագրական ծառայությունը այսօր հրապարակել է 2011 թ. հունվար ամսվա հիմնական մակրոտնտեսական ցուցանիշները: Հիշեցնենք, որ այսուհետ ԱՎԾ-ն չի հրապարակելու ՀՆԱ-ի վերաբերյալ ամսական ցուցանիշներ, փոխարենը հրապարակում է «Տնտեսական ակտիվության ցուցանիշը» (ՏԱՑ): Ըստ այդմ` այն 2011 թ. հունվարին կազմել է 7.7%` նախորդ ամսվա` 2010 թ. դեկտեմբերի համեմատ մոտ 2 անգամ ավելի քիչ:
Նշենք, որ ՏԱՑ-ը երկրի տնտեսությունում արտադրանքի թողարկման իրական ծավալի
փոփոխության ամսական ագրեգացված ցուցանիշն է: Այն ընդգրկում է տնտեսական
գործունեության բոլոր տեսակները և սկզբնապես հաշվարկվում է նախորդ տարվա միջին
տարեկան գներով, ինչը հնարավորություն է տալիս ունենալ տվյալ ամսվա արտադրանքի
թողարկման ծավալի իրական փոփոխությունը նախորդ ամսվա և նախորդ տարվա
համապատասխան ամսվա նկատմամբ: Յուրաքանչյուր ամսվա համար այն իրենից
ներկայացնում է ամբողջ տնտեսության համար մեկ ագրեգացված ցուցանիշ` ինդեքսի
տեսքով:
Ի տարբերություն Ազգային հաշիվների մեթոդաբանությամբ հաշվարկվող ՀՆԱ
ցուցանիշի (որն ունի եռամսյակային և տարեկան պարբերականություն), ամսական ՏԱՑ-ը բնութագրում է տնտեսությունում ապրանքների և ծառայությունների թողարկման ծավալների փոփոխությունը, այլ ոչ թե ավելացված արժեքի փոփոխությունը:
Բացի այդ, ամսական ՏԱՑ-ը չի ընդգրկում արտադրանքի զուտ հարկերը և ֆինանսական
միջնորդության անուղղակիորեն չափվող ծառայությունները (ՖՄԱՉԾ), որոնք ներառվում
են եռամսյակային և տարեկան ՀՆԱ-ի արտադրական եղանակով հաշվարկներում:
