Ամերիկյան առաջատար կազմակերպությունները, դրանց թվում Wal-Mart-ը, Royal Dutch Shell-ը և 7-Eleven-ը, նախատեսում են կոնսորցիում ստեղծել սմարթֆոնների օգտագործմամբ վճարման ընդհանուր համակարգ մշակելու համար: Այդ մասին տեղեկացնում է The Wall Street Journal-ը: Նախագիծը դեռևս գտնվում է նախնական փուլում և հնարավոր ներդրումների ու տեխնիկական մանրուքների մասին առայժմ ոչինչ չի ասվում:
Բացի նշավածներից՝ Merchant Customer Exchange (MCX) անվանումով կոնսորցիումի անդամ հնարավոր է դառնան նաև Best Buy, CVS Caremark Corp., Lowe’s Cos, Publix Super Markets, Sears Holdings, Alon Brands, Darden Restaurants, Hy-Vee և այլ ընկերություններ: MCX տարեկան ընդհանուր եկամուտը գերազանցելու է տրիլիոն դոլարը:
Թերթը նշում է, որ MCX-ը մտադիր է մրցակից ստեղծել արդեն գոյություն ունեցող Google Wallet համակարգի համար, որը Google-ը թողարկել էր նախորդ տարվա սեպտեմբերին: Այն օգնում է հատուկ չիպով համալրված սմարթֆոնների տերերին՝ իրենց գնումների համար վճարել դրա միջոցով:
Gartner Inc. ընկերության ուսումնասիրության տվյալների համաձայն՝ սմարթֆոնների և բջջային հեռախոսների միջոցով ընթացիկ տարում վճարումների թիվը կազմում է 172 միլիարդ դոլար, իսկ 2016 թ. այդ թիվը կհասնի 600 միլիարդի:
