Հայ մեծանուն գրող Հովհաննես Թումանյանի ծննդյան օրվա և Գրքի տոնի առիթով ՀԳՄ նախագահ Լևոն Անանյանը Լոռու մարզի Օձուն գյուղում էր:
Այստեղ անցկացվեց «Գրական խաչմերուկ» հերթական արշավը: Բացի մայրաքաղաքից ժամանած գրողներից ու դերասաններից` մասնակցեցին նաև տեղացի մտավորականները:
Ըստ Լևոն Անանյանի` օրեցօր նյութականացվող մեր ժամանակներում գիրքը հասարակության մեջ պահանջված չէ, ընթերցանության ճգնաժամը գնալով ավելի է խորանում:
«Եթե անցած դարի 80-ական թթ. միայն Օձունում 5 գրադարան կար, այսօր մեկը հազիվ է գործում: Շրջանների գրադարանների վիճակը մտահոգիչ է, միայն այս տարի շուրջ 3-4 հազար կտոր գրականություն հայթայթեցինք`մարզերում բաժանելու համար»,- ասաց ՀԳՄ նախագահը:
Անանյանի փոխանցմամբ, տարեկան «լավ, ներկայանալի» 2000 գիրք է տպագրվում: Պետությունը 135 մլն դրամ է հատկացնում գրահրատարակությանը, սակայն այդ գրքերը մայրաքաղաքից այլ տեղեր դուրս չեն գալիս:
Ըստ արշավի մասնակիցների` մի ժամանակ գիրքը լավագույն նվերն էր համարվում, այսօր բջջային հեռախոսն է դարձել մոդայիկ: Սրա համար բոլորը հավասարապես մեղավոր են և պատասխանատու: Պետությունը, մտավորականությունը, հասարակությունը, դպրոցն ու ընտանիքը պետք է այս ուղղությամբ մտածեն:
Բանաստեղծ Էդուարդ Միլիտոնյանը հիշեցրեց, թե նախկինում ինչ արժեք ուներ գիրքը` ամեն տուն իր գրադարանը ուներ: «Հպարտանում էին, որ նոր գրքեր են գնում, բաժանորդագրվում ու կարդում»,- ասաց նա` Հովհան Օձնեցու ծննդավայրում կոչ անելով հետևել սեփական օրինակին` երեխաներին հեռու պահելով «դատարկաբանությամբ և գռեհկությամբ հագեցած հեռուստասերիալներից»: Փոխարենը խորհուրդ տալով` հայ դասականների ստեղծագործությունները կարդալ:
