Կոալիցիայի վերջին հայտարարությունը, որով ՀՀԿ-ն, ԲՀԿ-ն ու ՕԵԿ-ը հայտարարում են հաջորդ ընտրություններում ևս Սերժ Սարգսյանին սատարելու մասին, ամենաշատը քննադատվեց ՀՅԴ-ի ու ԱԳ նախկին նախարար Վարդան Օսկանյանի կողմից։
Ընդ որում` Օսկանյանի քննադատությունն առավել քան խիստ էր։ Արդյո՞ք սա նշանակում է, որ Ռոբերտ Քոչարյանը, ԲՀԿ-ից հույսը կորցնելով, սկսել է ակտիվացնել պրոքոչարյանական մյուս ուժերին։
«Ղարաբաղ» կոմիտեի անդամ Սամվել Գևորգյանը կարծիք հայտնեց, թե Քոչարյանը երկիրն այս վիճակի հասցնելուց, արտագաղթը խրախուսելուց, մարտի 1-ի և հոկտեմբերի 27-ի ոճրագործություններից հետո այլևս իրավունք չունի «տրորելու այս երկրի հողը»։ «Նա հիմա պետք է փորձի իր կաշին փրկել, որպեսզի չհայտնվի բանտում։ Բայց ինչ էլ անի, դա նրան չի հաջողվի»,- նշեց նա։
Ըստ Գևորգյանի`ՀՅԴ-ում կան մտածող մարդիկ, որոնք կմտածեն ժողովրդի կենսագրությունից դուրս չմնալու մասին, կսթափվեն այս վիճակից ու կլինեն ժողովրդի կողքին։
«Չեմ կարծում, որ Քոչարյանը որևէ հնարավորություն ունի այլևս քաղաքականություն վերադառնալու։ Իհարկե, կարող է փորձի բանտում զբաղվել քաղաքականությամբ… Բայց միայն բանտում»,- նշեց նա։
Գևորգյանի կարծիքով, ՀՀ-ում ժողովրդի համբերության բաժակը լցվել է, այնպես որ` այսօրվա Հայաստանում Քոչարյանի պլանները հօդս կցնդեն։