Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին այսօր հանդիպել է Խվանչկարայի բնակիչների հետ: Հանդիպման ժամանակ Սաակաշվիլին անդրադարձել է գործազրկության խնդրի կարգավորմանը.
«Հավանաբար դուք կզարմանաք, եթե ես ասեմ, որ Վրաստանի տարբեր ոլորտներում շատ են աշխատատեղերը, պարզապես գործատուն ու գործազուրկը չեն կարողանում գտնել միմյանց: Ամբրոլաուրիում մենք կառուցում ենք մեծ տեխնիկում: Բացի այդ, Զբաղվածության նախարարությունն ամենուրեք բացում է իր բաժանմունքները:
Մենք մուտք կգործենք յուրաքանչյուր ընտանիք և կտեսնենք, թե մարդն ինչպիսի որակավորում ունի և ելնելով դրանից՝ նրա համար կգտնենք աշխատանք: Այն ֆոնին, որ Վրաստանում աճում է տնտեսությունը, անհնար է, որ ժողովուրդն աշխատանք չունենա»:
Հիշեցնենք, որ Վրաստանում գործազրկության դեմ պայքարի շրջանակներում որոշվել է այցելել ամեն ընտանիք և հաշվառել բոլոր գործազուրկներին: Բացի այդ, որոշվել է ստեղծել աշխատանքային բորսա, որը յուրօրինակ կամրջի դեր կխաղա գործատուի ու գործազուրկի միջև:
