Apple կորպորացիան թույլ է տալիս iPhone 4S և iPhone 4 սարքերի գնորդներին ԱՄՆ-ում իր մանրածախ ցանցի ֆիրմային խանութներում սակարկել: Գնորդները կարող են սմարթֆոնը ձեռք բերել 50 դոլար զեղչով: Այս մասին գրում է RIA Novosti-ն՝ հղում անելով MacRumors կայքին:
Զեղչ ստանալու համար անհրաժեշտ է, որ գնորդը ցույց տա, թե որտեղ է ինքն ավելի էժան գնով տեսել այդ սարքերը: Նշված սարքերի ստանդարտ գնից 50 դոլարի զեղչը ԱՄՆ-ում արդեն առաջարկում են Sprint օպերատորը, Target, Best Buy, Radio Shack մանրածախ կենտրոնները:
Մասնագետները գնիջեցումը պայմանավորում են iPhone-ի նոր սերնդի մոդելի մոտալուտ թողարկման սպասումներով: Նորույթը կներկայացվի սեպտեմբերի կեսերին:
Macworld հրատարակությունը հաստատել է զեղչային ծրագրի առկայությունը, որը չի տարածվում Apple Store օնլայն խանութից արված գնումների վրա: Նոր գինը բջջային օպերատորի հետ պայմանագրով iPhone 4S-ի համար կազմում է 150-350 դոլար (կախված հիշողության ծավալից), իսկ iPhone-ինը՝ 50 դոլար:
Apple-ի վերջին եռամսյակի արդյունքները ավելի վատն էին, քան վերլուծաբանների կանխատեսումները: Պատճառը iPhone-ի վաճառքի անկումն էր՝ սմարթֆոնի նոր տարբերակի մոտալուտ թողարկման շշուկների ֆոնին:
