Այսօր ռուսական Независимая газета-ում հրապարակվել է Աստրախանում կայացած հանդիպման մասին հոդված` ներկայացնելով Բաքվի փորձագետների կարծիքն այդ հանդիպման վերաբերյալ:
Հայաստանն ու Ադրբեջանը կարող են գալ համաձայնության Լեռնային Ղարաբաղի հիմնախնդրի կարգավորման հարցում մինչեւ ԵԱՀԿ գագաթնաժողովը, որը կկայանա դեկտեմբերի սկզբին Աստանայում: Այս մասին հայտարարել է ՌԴ նախագահ Դմիտրի Մեդվեդեւն Աստրախանի հանդիպումից հետո կազմակերպված մամուլի ասուլիսի ժամանակ: Սակայն Բաքվում որոշ փորձագետներ կարծում են, որ Աստրախանը կազմակերպվել է նրա համար, որպեսզի սառեցված հակամարտությունները չշեղեն գագաթնաժողովի հիմնական թեմայից` Մոսկվայի կողմից ներկայացված` Եվրոպայի անվտանգության նոր աշխարհագրության տարբերակների քննարկումից:
Ադրբեջանում կարեւորում են ձեռք բերված համաձայնությունը` ռազմագերիների եւ զոհվածների մարմինների փոխանակման վերաբերյալ, բայց նաեւ մտահոգություն են հայտնում ռուսական կողմի պահվածքի կապակցությամբ:
Նրանց կարծիքով, Աստրախանի հանդիպման անցկացումը ուներ երկու պատճառ: Դա, նախ, պայմանավորված էր նրանով, որ Ադրբեջանը խիստ դժգոհություն է արտահայտում բանակցային գործընթացում ստեղծված իրավիճակի կապակցությամբ` սպառնալով անցնել հարցի լուծման ռազմական մեթոդներին: Իսկ երկրորդ պատճառը, ըստ ադրբեջանցիների, եւ որն առավել անհանգստացնում է Մոսկվային, այն է, որ գագաթնաժողովը կարող է վերածվել կարգավորման վերաբերյալ Հայաստանի եւ Ադրբեջանի հակամարտության, ինչը կխոչընդոտի գագաթնաժողովի աշխատանքը, եւ դա արդեն մեկ անգամ տեղի է ունեցել Լիսաբոնում ԵԱՀԿ գագաթնաժողովի ժամանակ, երբ Երեւանի եւ Բաքվի կիրառած արգելափակման իրավունքի միջոցով կասկածի տակ էր դրվել վերջնական փաստաթղթի ընդունումը: Ռուսաստանն այսօր ավելի շահագրգռված է Աստանայում առաջ տանել Եվրոպայում անվատանգության նոր համակարգի ստեղծման իր գաղափարը` Հելսինկյան նոր պակտի ստեղծումը: Ուստի ռուսական կողմին ձեռնտու չէ, որ Աստանայում ղարաբաղյան հիմնահարցը լինի առանցքային:
