Երևանի թիվ 114 ավագ դպրոցում այսօր մեկնարկել է հանրակրթական ուսումնական հաստատության ղեկավարման իրավունք (հավաստագիր) ստանալու համար նախատեսված քննական գործընթացը։
ՀՀ կրթության և գիտության նախարար Արմեն Աշոտյանը, ողջունելով և հաջողություն մաղթելով քննության մասնակիցներին, նշել է.
«Դպրոցներում մեր սերունդներին լավ տնօրեններ են անհրաժեշտ ոչ միայն մարդկային, այլև հմտությունների, կարողությունների և գիտելիքների տեսանկյուններից։ Ուստի հանրակրթության մասին օրենքով սահմանված և մեկուկես տարի տևած նախապատրաստական գործընթացը համարում ենք ավարտված։
Մենք թեստերից հանել ենք բոլոր այն հարցերը, որոնք կարող են երկիմաստ թվալ, մեկնաբանելի և առաձգական լինել իրենց պատասխանների մեջ։ Փորձել ենք մասնագիտական վիճարկումների տեղ չթողնել, սակայն եթե կունենաք այլ տեսակետ և պատրաստ կլինեք այն հիմնավորել, հանձնաժողովը պարտավոր է ձեզ ազատ հնարավորություն տալ՝ արտահայտելու սեփական կարծիքը։ Եղեք ազատ, մասնագիտական բանավեճի բռնվեք և փորձեք ապացուցել, որ դուք ճիշտ եք»,- կոչ է արել Ա.Աշոտյանը և հավելել, որ չի բացառվում որոշակի ժամանակահատված անց գործընթացը կիրառվի նաև մասնավոր դպրոցների տնօրենների համար։
Նա տեղեկացրել է, որ ընթացիկ տարում կկազմակերպվի հավաստագրման ևս երկու քննական գործընթաց: «Հավաստիացնում եմ, որ սա այն հիմնական գործիքներից է, որով մենք կփորձենք բարելավել հանրակրթության ոլորտը մոտակա տարիներին, որովհետև դպրոցների կառավարման խնդիրներն այսօր խստապես շաղկապված են կրթության որակի, օրինականության հետ։
Մենք ցանկանում ենք, որ մեր դպրոցներում մեր երեխաների ապագայով զբաղվեն գիտակ, համապատասխան հմտություններ, գիտելիքներ ունեցող մարդիկ»,- ասել է Ա. Աշոտյանը։
Քննությունները կազմակերպվում են երկու փուլով` գրավոր (թեստային) և բանավոր: Առաջին փուլում 90 և ավելի տոկոս ճիշտ պատասխաններ ապահոված հավակնորդներն իրավունք են ստանում մասնակցել բանավոր փուլին: Քնությունները հաջողությամբ հանձնած հավակնորդները ստանում են հավաստագիր, որը տվյալ անձին իրավունք է տալիս հինգ տարի շարունակ Հայաստանի Հանրապետության տարածքում գործող ցանկացած պետական դպրոցում առաջադրվել և ընտրվել տնօրեն։
Քննական առաջին օրը հայտագրված 25 հավակնորդից մասնակցում էին 24-ը, որից 9-ը չեն հաղթահարել գրավոր (թեստային) փուլը: 100 տոկոս արդյունք են ցուցաբերել 2 հավակնորդ:
Հանրակրթական ուսումնական հաստատության ղեկավարման իրավունք (հավաստագիր) ստանալու համար անցկացվող քննությունները կշարունակվեն հետևյալ օրերին. 2011 թվականի փետրվարի 23, 25, մարտի 2, 4, 9, 11, 16, 18, 22, 23, 25, 29, 30, ապրիլի 1։
