«Առաջին լրատվական»-ին Հալեպից հայտնում են, որ այսօր քաղաքում տեղի ունեցած մարտերի հետևանքով զոհվել է մեկ հայ, մեկը` վիրավորվել է: Մեր աղբյուրը տեղեկացրեց, որ մարտերը քիչ առաջ են դադարել, ուստի առավել մանրամասն տվյալներ դեռ չկան: Մեր տեղեկություններով` մահացածի անունը Վիգեն է: Նշենք, որ այս մասին պաշտոնական տեղեկություն առայժմ չկա:
Yerkir.am-ի փոխանցմամբ, Հալեպի հայկական թաղամասերում այսօր տեղի ունեցած բախումների ընթացքում արձանագրված զոհերի թվում հիշատակվում են հայազգի երկու քաղաքացիներ, ովքեր ընդհարումներին մասնակից են դարձել կամավորության սկզբունքով և անհատական նախաձեռնությամբ անդամագրվելով իբրև հասարակական կամավորներ։
Սպանվածների մեջ են 1957 թվի ծնված Վիգեն Ղազար Քալիայջյանը և ևս մեկը , որի տվյալները ճշտվում են։ Մկրտիչ անունով մեկ հայ էլ վիրավոր է: Ըստ մեր ունեցած տեղեկությունների նրանք զինվորական ծառայության մեջ չեն եղել և անհատական նախաձեռնությամբ մասնակցել են հասարակական կարգի պաշտպանությանն ու դարձել բախումների մասնակից։
Լրատվամիջոցին հայտնի է դարձել, որ այսօր առավոտից Հալեպում գործող զինյալների խմբերը փորձել են գրավել հայաշատ թաղամասում գտնվող կառավարական շենքերից մեկը, ինչը կասեցվել է կառավարական զորքերի կողմից։ Շուրջ երկու ժամ տևած գործողությունն ավարտվել է, երբ իշխանությունները օդուժ են կիրառել և հետ մղել զինյալներին։ Այժմ արդեն համեմատաբար հանգիստ է և կրակոցները դադարել են։
Բերիո թեմի ազգային առաջնորդարանի խոսնակ Ժիրայր Ռեիսյանը yerkir.am-ին հաստատել է, որ տեղի ունեցած կրակոցներն ուղղված չեն հայերի դեմ:
