«Երբ Գագիկ Ծառուկյանը ստորագրեց Սերժ Սարգսյանի անունը պարունակող կոալիցիոն հուշագիրը, ՀՀ նախագահի պաշտոնը զբաղեցնող անձը նվաստացավ»,-լրագրողների հետ հանդիպման ժամանակ կարծիք հայտնեց հրապարակախոս Տիգրան Պասկևիչյանը:
Նրա կարծիքով, եթե նրանք կոալիցիա են, ապա նման բան չպիտի տեղի ունենար: Պասկեւիչյանը նշեց, որ թեև Քոչարյանի նկատմամբ իր վերաբերմունքը ընդգծված բացասական է, բայց նրա պաշտոնավարման տարիներին նման բան չի եղել:
Հրապարակախոսի կարծիքով, սա վախի մթնոլորտի արդյունքում արված քայլ է և կապված է Մերձավոր Արևելքում տիրող իրավիճակի հետ:
«Փորձը ցույց է տալիս,որ Մերձավոր Արևելքում կատարվող գործընթացները շղթայական ռեակցիայով տարածվում են, և այդ տարածումը կարող է հասնել նաև Հայաստան և Հայաստանի իշխանությունները փորձեցին ճշտել իրենց դիրքային հարցերը:
Հրապարակախոս Արծրուն Պեպանյան էլ նշեց. «Հայաստանի կուսակցությունները ինձ չեն հետաքրքրում, քանզի դրանք բիզնես ակումբներ են: Այդ կուսակցությունները ամենամեծ ցանկության դեպքում անգամ չեն կարող Հայաստանը առաջ տանել:
Իշխանական համակարգերի վարքը քննելը ես համարում եմ անլուրջ փորձ»:
Այդուամենայնիվ Պեպանյանը նշեց,որ ինքը կցանկանար ՀՀԿ-ԲՀԿ միասնությունը չլիներ, և այդ կուսակցությունները տարաձայնություններ ունենային: