Ադրբեջանական 1news.az-ի փոխանցմամբ՝ այս տարվա առաջին վեց ամիսներին Ադրբեջանի ու Ռուսաստանի միջև ապրանքաշրջանառության ծավալը գերազանցել է 1 միլիարդ դոլարի սահմանագիծը՝ կազմելով 1035 միլիոն դոլար: Այս մասին հայտարարել է Ադրբեջանի պետական մաքսային կոմիտեն:
Այդ 6 ամիսներին ադրբեջանական արտահանումը դեպի Ռուսաստան կազմել է 394.2 միլիոն դոլար, ինչը կազմում է Ադրբեջանի ողջ արտահանման 3.1 տոկոսը: Միևնույն ժամանակ ներկրումը կազմել է 640.9 միլիոն դոլար՝ Ադրբեջանի ողջ ներկրման 14.37 տոկոսը: Ադրբեջանի համար ապրանքաշրջանառության բացասական սալդոն կազմել է 246.7 միլիոն դոլար:
Նշվում է, որ 2011 թվականի առաջին կիսամյակի հետ համեմատ՝ ադրբեջանական արտահանումը դեպի Ռուսաստան կրճատվել է 41 տոկոսով, իսկ ներկրումը՝ 17.4 տոկոսով: Ողջ 2011 թվականին Ադրբեջանի ու Ռուսաստանի միջև ապրանքաշրջանառության ծավալը կազմել է 2828 միլիոն դոլար, ինչը 910 միլիոն դոլարով գերազանցում է 2010 թվականի ցուցանիշը:
