Վենեսուելայի նախագահ Ուգո Չավեսը հայտարարել է, որ ևս մեկ ժամկետ պաշտոնավարելու դեպքում` մինչև 2019 թվականը երկրի յուրաքանչյուր բնակիչ կստանա «արժանի բնակարան»: Այս մասին հաղորդում է RBK-ն: Հարավամերիկյան պետությունում 3 միլիոն բնակարանի կարիք կա:
Ներկայում Վենեսուելայի իշխանությունները արդեն 200 հազար տուն են տրամադրել կարիքավորներին: Ի դեպ, այդ թիվը կասկածի տակ է դնում ընդդիմությունը` Էնրիկե Կապրիլեսի գլխավորությամբ:
Ուգո Չավեսը իր հայտարարություններով հանդես է եկել օգոստոսի 5-ին` Վալենսիա քաղաքում ընտրողների հետ հանդիպման ժամանակ: Հավաքվածների առջև Չավեսը Աստծուց առողջություն է խնդրել: Նրա խոսքով` իր առաքելությունը երկրի վրա չի ավարտվել: Ջանքեր են անհրաժեշտ «ժողովրդավար բոլիվարական սոցիալիզմի շինարարության» համար:
Վենեսուելայում նախագահական ընտրությունները կկայանան 2012-ի հոկտեմբերի 7-ին:
